Aizawl; Indian Society on Tobacco & Health Mizoram Chapter leh Mizoram State Tobacco Control Society chuan Mizoram chhimlam district pahnih Lawngtlai leh Saiha ah te nau chunga thihna a tlem zawk theihnan hmalak an tum a, hemi kawnga an hmalakna hmasa tan November ni 19 leh 20 hian Lawngtlai leh Saiha ah Anti Tobacco Awareness Campaign an nei dawn. ISTH Mizoram Chapter President Lal Riliani chuan, "Nu, nau pai lai ten mei an zuk avang te, mi meizuk khu an hip avang te leh naupang pawhin midang meizuk khu an hip (secondhand smoke) avangin nasa takin an tuar a. Heng district pahnih ah te hian nausen thihna leh nu, nau chunga thihna a thlen nasat avangin hmalak a ngai niin kan hria a, chuvangin thihtawpa hmalak kan tum a ni," tiin Zalen palai a hrilh. MSTCS thawktute sawi danin Lawngtlai leh Saiha district hi vantlang hmuna meizu an la tamna hmun a ni a, hei vang hian meizu velo te pawhin a khu an hipluh nasat avangin nasa takin an tuar a, chu chuan an hriselna pawh a khawihchhia niin an sawi.