ZALEN October 16, 2023 : Ni hnih cham tura Mizorama rawn tlawh Congress hruaitu Rahul Gandhi chuan hnam zia, hnam dan leh tawng te beiha a awm mek chu pawi a tih thu a sawi. "Keini chuan in Culture te, in hnam dan te, in tawng te kan humhalh sak tlat dawn che u," a ti.

Rahul-a chuan, "In hnen atanga inzir turin ka rawn kal. In kiangah ka kal ang a, North east mi tam zawk te hmuh ka tum a ni. Mitin chunga zahna te, ngilneihna te, inngainatna lantir te hi kan tum leh duh ber a ni," a ti bawk.

Manipur a tlawh tuma a thil hmuh chungchhanga BJP a dem thu sawiin, "Manipuri te inunauna an tihchhiat nasat zia chu ka ring theilo zawk hial a, Manipur chu state pakhat an ni tawh lo, state pahnih a inthen ang an ni tawh. An inthat mek a, hmeichhia te pawh an zuah lo! Chutih laiin kan Prime Minister chuan Manipur aiin Israel a vei zawk a, Prime Minister in Manipur a tlawh loh chhan hi ka hrethiam thei lo ni," a ti.

BJP hnuaiah India rama Minority te hi an lung a muang lo nia sawiin, "Tribal leh Dalit te pawh an hlauthawng mek a ni. Manipur-a inunauna an tichhia mai a ni lova, Manipur chunga India rilru puthmang pawh an tichhia a ni. Keini chuan hnam tin te culture leh tihdanphung te vawnhimsak hi kan tihtur ah kan ngai a ni," a ti bawk.

MNF chungchang sawiin, "In hnenah hian kum nga kal ta chhunga in sawrkar thiltih dan ka sawi duh a. MNF hian Centralah BJP an thlawp ani tih ka hrilh duh che u a. Drugs nasa takin a hluar mek a, thalai te hmakhua thlengin a tichhe mek a ni. Tunhnaiah thalai 250 zet ten Drugs vangin nunna an chan a. Thalaite hian hna an hmuh loh avangin beidawngin an awm a, Drugs lamah an tlan phah a ni. MNF hian tun kum 5 chhungin hna mi 2000 chiah an siamchhuak thei a, kawngpui leh hmasawnna dan an thawk chhe em em mai a ni," a ti

Congress chuan sawrkar tha tak an din thin nia sawiin, "Karnataka ah chuan Congress sawrkarin mipuite hamthatna tamtak kan siam mek a, khawvela a tha ber zinga mi a ni. Mipuite hamthatna engkim an account ah a lut tawh a, hmeichhiate tan Bus chuan man a awm lova, Loneitute an mamawh ah tanpui an ni mek a ni. BJP Sawrkarna State ah chuan Gas Cylinder man ni Rs.1000 chuang a ni a, Congress sawrkarna Rajasthan ah chuan Rs. 500 man chauh a ni," a ti.

"Congress sawrkarna Chhatisgarh ah chuan loneitu ten an buh chin atangin hlawkna tamtak an dawng a, ram chhunga a thar hlawk ber an ni a, hei hian an State economy a chawikang mek a ni. English Medium School pawh 377 zirlai rethei te tan an hawn belh a ni," a ti bawk.   `

Pawisa leh chhiah chungchang sawiin, "BJP chuan sumdawng tenau te tan harsatna an siam char char a, GST te hi sumdawng tenaute tan chhiatna a ni a, loneitute tan pawh harsatna a ni.

Pawisa tih thih te kha kan PM idea atthlak tak vang a ni a, kan economy hian nasa takin a la tuar mek a ni. Engkim mai hi mipakhat hausakna tur a duan a ni a, chu chu Adani a ni. BJP thuneihna hman dan hi thil zahthlak tak a ni," a ti.