Mizo film industry-in hma a sawn kan tihfo thin kha maw! Hmasawn kan tih chuan sum leh pai hi a lan chhuahna hmasa ber pakhat a ni fo thin, In-House Production ten film an siamna atanga an sum hman ral leh an lakluhte tarlang dawn ang aw. 

In-House Production hian film pali (4) siam nan hian a vaiin Rs. 25.5 lakhs an hmang a, hei hian a changtute hlawh leh crew hlawh bakah an senso dang pawh a huam vekin a rinawm. Heng film pali atanga an sumlakluh belh khawm hi Rs. 120.4 lakhs zet a ni ve thung a, an chawi belh lo tih chu kan hrethiam mai awm e. 

Mahse engzat chiah nge an hlawh chhuah tak ang tih erawh hriat thiam harsa tak a ni ta. Application-a an dah hian app neitute nen share an insem thin a, an share insem dan erawh hriat a ni lo. Film siamtute lam hi chuan an chang tam zawk ngeiin a rinawm a, chuvang chuan In-House Production hian film an siamna atang hian sum thahnem tak an hailut tih chu a chiang mai awm e - an kal leh zelna turah ZALEN chungkua chuan duhsakna kan hlan e.