Brezna Ethno-a khaw pakhat Donja Brezna, Montenegro hmun nuam takah chuan an lo tih fo thin tawh angin in mut rei siak an buatsaih a, darkar 117 (ni 5) chhung mu thei Duda Aksić-i chu pakhatna niin world record a siam.  

Nikum August thlaa buatsaih in mut rei siak hi an vawi 10 buatsaihna a ni a, mi thatchhe zawnna tiin fiamthu ang deuha kalpui a ni. Contestant te chu leiah mu-in tho chhuak lo va, mu rei thei ber an zawng a ni.

Montenegro public broadcasting service (RTCG) sawi danin he an in mut rei siak buatsaiha lawmman dawngtu pakhatna atanga pathumna te hian world record an khum vek a ni. An lawmman in chuh hi US dollar 353 chauh a ni lehnghal. 

Montenegro ethno village neitu leh contest huaihawttu Radoje Blagojević chuan,"RTCG lam chhinchhiah danin kum hnih hma lama world record an lo siam tawh chu contestant pathum te hian an khum vek a ni," a ti. 

Sawi zawmin Blagojević chuan,"Kum hmasa lama an buatsaihah chuan zun ram thiar phal a ni lo va, hemi tum hi chuan darkar 8 hnu zelah toilet kal phalsak an nih vangin a awlsam deuh zawk pawh a ni maithei," a ti. 

Pakhatna Duda Aksić-i chu darkar 117 a mu thei a, pahnihna Nikola Bosković-a hi minute 5-in a tho hmasa a, pathumna Marko Vučković pawh darkar 115 chhung a mu a ni. 

Pakhatna nu chuan,"A harsa ve takzet a ni, a bik takin zing lam dar 3 vela ruah nasa taka a rawn sur khan a vawt em em a, blanket kan thuah chung pawhin ka chhunzawm peih lo hman tep a ni. Taksa te hi a na vek thei nia mawle," a ti. 

In elna an kalpui mek lai hian, in elna buatsaihtute chuan an lawmman chu US dollar 412 ah an san sak nghe nghe.