Aizawl June 10, 2024 : Vawiin khan Bawngkawn leh Leitan inkar, Haflong pelh kawng chhaka Petrol pump tur nia sawi Lei laih avanga harsatna thleng leh lungrem chim avanga mipui kal vel tana him lo chu MPYCC in a hmunah an enfiah.

MPYCC chuan, "Aizawl Municipal Corporation thupek ang chuan Bawngkawn leh Haflong inkar meter 200 huam chhung leh Haflong leh Leitan inkar meter 900 huam chhung kawngpui dungah in pakhatmah sak phal loh a nih laiin MNF sawrkarah khan mi tam takin in an sak bakah ke a kalna tur te pawh a duh duhin an duh dan danin an ti danglam a. Haflong leh Leitan inkar in sak phal lohnaah in tam tak sak niin kumin maia Cement Concrete sak thar pawh AMC lamin sa tawh lo tur leh thiat tura an tih hnuah sak zawh leh vek tawh a ni," an ti.

Congress Thalai chuan, "Haflong pelh Leitan lamah Dr. Lalrengpuia petrol pump tur nia sawi nasa taka laih a chung sang lungrem chu a min a. Lungrem chim hian mi tam tak nunna him lovah a siam mek a. Hei hi mipui kal vel tan a hlauhawm avangin mi tlawmngai te pawhin theihtawpin thuneitute hnenah a ranglama hmala tura ngenna an lo nei hial tawh a ni," an ti.

Khawpui enkawltu AMC berin thuneihna hmansual a, thiltithei leh hausa zawk te nena inti lungawi tawn a, khawpui him lo leh khawpui chep taka a siam mek hi MPYCC chuan bansan vat turin a phut a. Damdawiin pan tur leh zirna bakah hnathawna hmun a hun taka thleng thei lo leh kal vel hlauhawm taka siam a ni leh kawng nasa taka tihchhiat a nih chungchangah hian LSC petu leh laih phalna petu te hnenah sawrkarin a tul anga hmala thuai turin MPYCC chuan an phut a ni.