Aizawl: MPCC President Lal Thanhawla chuan, “Opposition bialte enhranna kan nei lo va, kan sawrkar chuan inang khat vekin bial zawng zawng kan enkawl a ni,” a ti.   South Tuipui Block I, II leh III ten Zirtawpni kaltaa Hnahthial Market Building Conference Hall-a Joint Block Conference an neihah he thu hi sawiin MPCC President chuan, “Kan hotute hi chuan Lal Isua lam tang policy leh programme an ngaihtuah hram hram thin a, Lal Isua lama tan hlawkzia chu he hnam hian a takin a hmu tawh a, englai pawha Lalpa hnena lawmthu sawi tur kan ni tih kan inhriat ka duh a, a chhan pawh Congress chauh hi tum 5 a sawrkartir awm chhun kan ni.   Tunah hian sawrkar leh turin a puahchah che u a, keimahni hian kan zo ang em tih kan in ngaihtuah tur a ni a, Zoram pumpui boruak kan thlir chuan sawrkar tir leh che u a tum a ni,” a ti.   He huna khual zahawm leh bialtu MLA ni bawk, John Siamkunga pawhin thu sawiin Chief Minister duhsakna avanga a bialten hmasawnna hrang hrang an hmuh vangin lawmthu a sawi a. MPCC President Lal Thanhawla chu hruaitu ropui leh Zoram mipuite hmangaihtu a nih thu a sawi bawk.