Aizawl October 15, 2023 : Mizo National Front party chuan Independent MLA 5 te khan kha leh chen kha dan an lo bawhchhe char char a ni tih an mahni ngeiin an nemnghet niin an sawi.

Nimin khan Aizawl Press Club-ah chanchinbumite kawmin MNF Media & Publicity general secretary VL Krosshnehzova chuan he thu hi sawiin, "Kum 2018 khan khatih laia pawl thenkhat inhlawmkhawm chuan pawl thar dinin Zoram People Movement an invuah a. MLA Election hmachhawn tura inbuatsaihin, Party Politics chu ramin kan chhiatpui tiin an tlang au a, ‘Party kan ni lo, Movement kan ni, mipui pawl kan ni’ an ti a. Candidate insiamin, an candidate pawh Independent vekin Nomination an file a, Party kan ni lo, tia mipuia inzuar chuan anmahni vote tlingtute uire sanin, July ni 23 2019 khan Election Comission-a an in-register lawmna hunte an siam a. Independent MLA an nih miau avangin khatih laia Independent MLA - Lalduhoma, Vanlalhlana, C Lalsawivunga, Dr Vanlalthlana, Lalchhuanthanga leh VL Zaithanzama leh Andrew H Thangliana (L) te kha party-ah chuan danin a phut angin an awm ve a rem lo a ni," a ti.

MLA atang Lalduhoma ban tura MNF MLA 12 te hmalakna chu a dik tih sawiin, "Dan bawhchhetu zawk chu kha tih laia Independent MLA Lalduhoma a nihzia, Independent MLA 5 Vanlalhlana, C Lalsawivunga, Dr Vanlalthlana, Lalchhuanthanga leh VL Zaithanzama te banna thehlut ve ta hian a pholang chiang hle a. ZPM Party candidate ni tura Independent MLA an nihna bansan a tul ang chiah hian Independent MLA tan Party pakhat khuangvuak ruala a neitu cheta lo chet ve kha dan kalh a ni tih Zoram mipuite hian kan hmu fiah ta telh telh a ni," tiin, "ZPM MLA 5-te hian kha leh chen kha dan an lo bawhchhe char char a ni tih an mahni ngei hian an nemnghet a, an mahni mawng an hlim chiang hle a. Dan bawhchhe reng chunga rorelna fawng vuan MLA khati zat kan lo nei reng kha a vanduaithlak tak zet a ni," a ti bawk.