Mizoram Basketball Association (MBBA) chuan ram 70 chuanga inzar pharha basketball data hrang hrang khawla chhinchhiahtu, NBN23 chu inremna a ziahpui a, India rama basketball association zinga a player-te dinhmun fel fai taka chhinchhiah (digitize) hmasa ber a ni dawn ta.

MBBA hian an hnuaia Mizorama league sang ber, Mizoram Super League (MSL) 8-ah khan NBN23 Swishh App hi enchhinna atan a lo hmang tawh a, tunah chuan a tak taka hmanga thawkho turin inremna thuthlung a ziahpui ta a ni.

Nilainia Park Plaza Hotel, Ludhiana, Punjab-a inremna an ziahah hian K Zorammuana, Vice President leh Zomuanpuia, General Secretary ten MBBA aiawha hming ziakin NBN23 aiawhin an expansion manager, David Garcia leh India-a an manager, Gopalakrishnan R ten an ziak ve thung a ni.

Inremna an ziah angin MBBA player-te khelmual chhunga an chet dan chu NBN23 hian a numbar zawngin a lo chhinchhiah zel tawh tawh dawn a ni. 

NBN23 hi Spain-a hmunpui nei niin khawvel pum huap pawha sports technology company hriat hlawh a ni a, an tum ber chu khawvel pumah ei zawn nana hmang lova basketball khel (amatuer basketball)-te dinhmun chhinchhiah a ni.

Tunah hian ram 70 chuanga basketball inkhel huaihawt thinte leh player nuai 25 chuang enkawltute nen inremna an ziak tawh a ni.

NBN23 nena inremna an neih tak avang hian MBBA hi India ram basketball-a a player-te statistic digitise hmasa ber tur an ni dawn ta a. Digitize statistic hi computer hmanga tih niin a en leh hriat thiam a awlsam bik a ni.