ZALEN, Dec. 01, 2024: India ram pum huapa kawng rualrem lova bike intlansiaknaah Shaun Lalremruata Chhangte chuan a hming lo chher tawhnaah a tum angin che tha lo mah se inelna huang dangah pathumna niin dawhsan a lawn phak leh ta tho va. India ram pumah 3-na a ni phak.

College Veng, Aizawl tlangval hi Inrinni zana championship round hnuhnung berah round hmasa lama podium vawi thum a lo rah phak tawhna, Private Expert-ah dawnsan lawn phak lo chiah chiah mah se Indian Novice Class-ah erawh 3-na niin a lawn leh thei.

Intlansiak round rukna hi Cochin, Kerela-ah neih niin Shaun-a hi huang (class) pathum - Indian Expert, Private Expert leh Indian Novice Class-ah a tel a. Madhya Pradesh, Maharashtra leh Karnataka-a a dawhsan a lawn phakna, Private Expert Class-ah erawh a bike a chiangkuan loh avangin duhthusamin tlan thei lo va, dawnsan lawn pha lo chiahin 4-naah a thleng tho.

Shaun-a hi championship-ah hian Bhopal, Madhya Pradesh-a October 27-a Round 3-ah khan Private Expert Class-ah 2-na a ni a. Pune, Maharashtra-ah khan 3-na Bengaluru, Karnataka-a Round 5-ah 3-na bawk a ni leh.

Tun championship-a a chet that avang hian Shaun-a hi Private Expert Class Overall Championship-ah India ram pumah 3-na a ni thei a ni.

Kum 23 mi, Shaun-a hi Mizoram atanga hetiang inelnaa tel hmasa ber a ni a, supercross championship-a a tel tawhnaah lawmman a la vek a ni.

Intlansiak tur an tlan zawh tak avangin Nilaini hian Aizawla haw turin a inruahman.