Mizoram Arm-Wrestling Association (MAA) chuan an player pahnih, ram pumah pawh an huanga tha ber, India ram tana an feh chhuahnaah lawmman dawngtute chu Thawhlehni hian Lengpui Airport-ah an lo haw an lo hmuak dawn.

Aizawl tlangval pahnih, Lalawmpuia, Luangmual leh VL Zothansanga, Khatla te hi India rama arm wrestling inelna pui ber, Sheeru Classic Arm Wrestling Championship 2023 gold medalist ve ve an ni a. Hei vang hian Indian Arm-Wrestling Federation (IAF) pawhin August 11-13, 2023 chhunga Bangladesh khawpui, Dhaka-a Indo-Bang Championship 2023 neih zawh taka India aiawh tura a thlan niin an telna huangah lawmman an la ve ve zui bawk.

Asia chhim lam rama bazarpui (shopping mall) lian ber, Future Park-a West Court-a Indo-Bangla Arm Wrestling Championship-ah hian India atangin weight category hrang hrang 11 aiawh kalin an zinga paliin chakna an chang a. Zothansanga hian kg 75 huangah gold lain Awmpuia hian kg 100 huanga gold a la bawk.

Zothansanga leh Awmpuia hi India ram pum huap intihsiaknaah pawh vawi eng emaw zat Mizoram tana medal an hawn tawh an ni a. Awmpuia phei hi chu India ramah pawh a ber nihna lo hauh tawhin weight zawng zawng gold medalist intum khawm lehnaah pawh a chak ber a, ‘champion of champions’ a ni thei hial.

Dhaka khawpuia inelnaah hian IAF Vice President Pran Chaliya-a’n a hruai a. He inelna hi a nep lo hle a, India atang hian player tha ber ber thlan chhuah an ni a. Bangladesh pawh hian May 16 leh 17 daih tawhah khan he inelnaa tel tur zawnna hi an ram pumah kalpuiin a tha ber ber player 11 an chhuahtir ve bawk a ni.

MAA chuan Mizoram mai ni lo, India tihmingthatute pahnih, Zothansanga leh Awmpuia te hi an lo haw hmuah an tum a, “Kan Mizo player pahnih kalten hlawhtlinna ropui tak changa medal an rawn hawn hi kan lawmpuiin kan chhuang takzet a ni,” an ti.