Kum 2023 chhung khan India ramah car chi hrang hrang 4,108,000 zet hralh chhuah a ni a, kum khat chhunga car hralh chhuah tam ber kum a thleng hial. Nikum chhunga car hralh chhuah tam ber chu Maruti Suzuki Swift a ni a, 203,469 zet an hralh chhuak. 

Maruti Suzuki chungnung

India ramah car siam chhuaktu company lian tak tak an awm nual a, chung zingah chuan Maruti Suzuki an sang filawr lak. India Today chuan kum 2023 chhunga India rama car hralh chhuah tam zual list an tihchhuak a, top 10-ah Maruti Suzuki kutchhuak car pasarih zet a lang! Tata Motors chuan dawtin, top 10-ah an kut chhuak pahnih a lang a, Hyundai Motor kut chhuak pakhat a lang ve bawk. 

Kum 2022 khan India ramah car 3,792,000 lai hralh chhuah a ni a, hei hi kum 2023 khan chiang takin khum leh nghal a ni a, car 4,108,000 zet hralh chhuah a ni. Car hralh chhuah tam lamah hian Maruti Suzuki ten ro an rel a, top 4 te chu an kut chhuak vek a ni nghe nghe. Swift chu hralh chhuah hnem ber niin, Suzuki WagonR, Baleno leh Brezza ten an dawt. Tata Nexon chu pangana-ah a tla zep a, parukna chu Maruti Suzuki kut chhuak tho Dzire a ni. 

Top 10-ah hian - Hyundai Creta, Tata Punch, Maruti Suzuki Eeco leh Maruti Suzuki Ertiga te an lang bawk. 

Car hralh chhuah tam zual top 10 

1. Maruti Suzuki Swift - 203,469 

2. Maruti Suzuki WagonR - 201,302 

3. Maruti Suzuki Baleno - 193,988 

4. Maruti Suzuki Brezza - 170,588 

5. Tata Nexon - 170,311

6. Maruti Suzuki Dzire - 157,522 

7. Hyundai Creta - 157,311

8. Tata Punch - 150,182

9. Maruti Suzuki Eeco - 136,010 

10. Maruti Suzuki Ertiga - 129,967