Mihring tamna India chu khawvela Covid-19 hri kai tam berna zinga mi a ni a, mi vaibelchhe 4.4 zetin hri hi an kai tawh tih Union Health Ministry chuan a tarlang. India-ah hian hri kai thar an pung chho nasa leh tawh hle bawk a, ni khatah hri kai thar mi 16,299 zet an awm leh tawh.
 
Union Health Ministry data atanga a lan dan chuan darkar 24 liam ta chhung khan hri kai thar hi mi 16,299 zet an tling leh tawh a, hetih hun chhung vek hian mi 53 ten an thihpui bawk. Khawpui hrang hrangah inkhuah khirhna an kalpui tan leh mek a, hrikai hi a vang lai ang kha a thleng chho leh mai ang tih a hlauhawm hle. Delhi sawrkar chuan mipuite chu khawlaiah musk vuah vek turin thu a pe a, dan zawm lote chu Rs. 500 zel chawi tir an ni. 

Kum 2019 atanga Covid-19 a len atang khan India-ah hian hri kai hi mi 4,42,06,996 zet an awm tawh a, thihpui pawh mi 5,26,879 an awm tawh bawk. Hetih lai hian ram mipui mi vaibelchhe 198.34 zet hnenah vaccine pek a ni tawh thung. Tun dinhmunah active case 1,25,076 lai an awm leh tawh a, hri hian ram pum a tuam leh mai ang tih a hlauhawm hle.