C. Lalramsanga chu India ram pum huapa badminton inelnaa junior huanga champion thei hmasa ber a ni ta a. Hetih rual hian hmeichhe lamah Lalrempuii’n bronze medal a hlawh chhuak ve bawk.

Kar kal ta Ningani atanga Panchkula, Haryana-a 31st Smt Krishna Khaitan All India Junior U-19 Ranking Badminton Tournament khelh mekah Durtlang rawlthar, Ramsanga hian mixed doubles-ah a kawppui, Vishakha Toppo nen an champion.

Mission Veng Badminton Club-a khel lai, Ramsanga leh Toppo te tang dun hian final-ah hian Seeded No. 1 Mithilesh P. Krishnan leh Manya Ralhan te tangdun an hneh a ni.

Ramsanga hi tun hnaia NE Zone Inter-state Badminton Championship-a Boy’s Team Championship-ah hian Mizo rawltharte an champion tuma player thawhhlawk tak kha a ni a. He inelnaah hian Men’s Championship-ah pawh Mizoram hi pahnihna a nihpui bawk.

Ramsanga hian Kotak India Junior International Series 2024-ah Pragati Parida nen tang dunin mixed doubles-ah bronze a lo la tawh, khawvel huap inelnaa Mizo zinga medal la hmasa ber a lo ni tawh a. Yonex-Sunrise India Junior International Grand Prix 2024-ah bronze pahnih a lak belh leh tawh bawk.

Rempuii a vul

Haryana-a inelna vekah hian Serchhip tleirawl, Rempuii chuan girl’s doubles-ah a tanpui, Tanoo Chandra nen bronze medal an la phak bawk.

Rempuii leh Chandra-i te hi qualifying round atanga khel tanin an kalkawng-ah rinkai langsar zual eng emaw zat an vaw thla a, semifinal-ah Seeded No. 1 Pragati Parida leh Vishakha Toppo-te tangdun lakah 21-18, 21-18-in an chak zo ta lo a ni.

NE Zone Inter-state Badminton Championship-ah tho khan Rempuii hi Girls’ Team Championship-ah Mizoram chu pahnihna nihpuiin thawhhlawk ber zinga mi a ni.

Mizoram Badminton Association (MBA) chuan All India Junior Badminton Ranking Tournament-a Mizo zinga champion thei hmasa ber, Ramsanga leh Rempuii te hi a lawmpui tak zet a, duhsakna sang ber a hlan nghal bawk.