ZALEN, September 01, 2025: Serchhip rawlthar, C. Lalramsanga chuan India badminton khawvelah hming chher zelin chawlhkar zawnin Badminton World Federation (BWF) tournament-ah medal a la ta a. Pathiannia khelh zawh tak, India Junior International Grand Prix 2025-ah Taarini Suri nen inkawpin mixed doubles-ah silver medal an la leh.

Mission Veng Badminton Club (MBC)-a khel mek, Ramsanga hian kar hmasa khan Hyderabad, Telengana-a BWF Junior Ranking Tournament, Kotak India Junior International Series 2025-ah Bhavya Chhabra nen tang dunin men’s doubles a lo la tawh bawk.

Thawhlehni atanga Pune, Maharashtra-a BWF ranking tournament ngaihhlut hlawh, India Junior International Grand Prix 2025-ah hian Ramsanga leh Suri te hian Seeded No. 2 ni chungin inelna an hmachhawn.

A hmasa berah Malaysia player tha, Ahmad Redzuan leh Teh Si Yan-te inkawp lakah game hmasa ber hloh mah se 17-21, 21-15, 21-17-in an lehthal a. A dawtah Indian pair, Bjorn Jaison leh Aanya Bisht te tangdun chu 21-19, 21-13 in an hneh a, quarterfinal an lut. 

Quarterfinal-ah hian Thailand atanga inlan, Tachin Wiriyachairerk leh Sarisa Janeng te inkawp chu 21-18, 21-17-in an hneh leh a. Semifinal-ah Japan player tha leh Seeded No. 3 ni bawk, Shuji Sawada leh Aoi Banno te tangdun lakah game hmasa ber hloh mah se 19-21, 21-12, 21-13-a paltlangin final an lut.

Pathiannia final khelhah India pair, Vansh Dev leh Shravani Walekar te inkawp an hmachhawn a, 21-12, 21-13-in a tlawm zawkah an tang a, silver medal an hlawh chhuak. 

Ramsanga leh a kawppuiin Pathiannia medal an lakna hi kar hmasaa Hyderabad-a silver medal a lakna aia ngaihhlut hlawh zawk a ni a. Tun karah hian Agartala, Tripura-ah North East Inter-State Badminton Championship 2025-ah Mizoram aiawhin a inlan nghal dawn a, October-ah BWF World Junior Championship 2025-ah India aiawhin a inlan bawk ang.

Mizoram Badminton Association (MBA) chuan BWF tournament ngaihhlut hlawh leh ranking point nei sanga Ramsanga’n final a thleng thei hi a chhuangin a lawmpui hle tih an sawi.