ZALEN October 22, 2024 : Vawiin khan MNF din champha vawi-63 lawmna hman a ni. MNF din champha vawi 63-na lawmna inkhawm Hnam rûn a neih a thusawitu MNF President Pu Zoramthanga chuan, "India Airforce kutah kan Lengpui Airport hi Mizoram Sawrkarin pek an tum chuan MNF chuan a tawp thlengin kan do dawn," a ni, a ti.

Lengpui Airport chu nunna hnar, ram dang nen inpawhna a ni a. Ramri buai chungchang leh Covid avanga harsatna tawh tawhte sawiin; Silchar kawng a ping a, Rail kawng a pinga a buaithlak zia hriat a ni tawh. Chuvangin, Airport hi midang kutah hlan a remlo. NGO, Political Party, Kohhran leh ngaihtuahna fim tak hmang phak Thangtharte pawhin an remtih a rin loh thu a sawi bawk.

MNF President chuan kum khat em pawh an sawrkar hma a sum leh pai harsatna avanga sawrkar mek an buai zia sawiin. Tun ang zela sawrkar mek hi an kal chuan, rei an sawrkar a rin loh thu a sawi.

MNF President chuan, "MNF hi 'Pathian leh kan ram tan' tih thuthlung neia din a nih avangin, Mizoramah ngei pawh Party 30 chuang zet lo zuihral tawh karah Pathianin vawiin hian kum 63 kan din champha min hruai thleng a, Pathian chuan min hruai zel dawn a ni," tiin, "Zoram hmun hrang hranga awm MNF te phur taka leh tha thlah hauh lova, kan ram kan hnam tan theih tawp i chhuah zel ila, Pathian hruaina a innghat tlat a, hma lam pan zel tur kan ni," a ti bawk.

MNF din champha vawi 63-na lawmnaah hian Martar-te pualin ngawi renga dingin minute 1 hun hman a ni a, Mizo National Women Front, General Headquarters chuan, ''Kan Zoramah Lal Krista tan' tih hla chu mawi takin an rem a. Zaithiam Rinhlui Tlumang chuan kalkhawmte thiam takin zaiin a awi bawk.

Mizo National Front din champha vawi 63-na pual a Mizo Hnam Rûn-a hmanna hi, Vanlalzawma Vice President, MNF in kaihruaiin, Rev. Lalrinmawia Ex-Moderator, Mizoram Synod chuan hunserh a hmang a ni.