• F.Lalrinfela

Time zone khat hmang khawvela ram lian ber, khawvela democracy ram lian ber ni bawka Ni chhuah hmasakna lam atanga Ni tlak hnuhnung berna hmuh tlawh hi thil namai a ni lo a, India ram map en mai pawh hian kar a zau khawp mai. Mizoram sawrkar leh Information & Public Relation, Government of Mizoram ram ten chanchinbu mite tana Press Tour an buatsaih zarah he hun hi ka tawng a, kan rama ni tlak tawpna hmun ka zuk tlawh piah lamah tawn hriat hlu tak tak ka tawng a, hlu tak a ni.

Motor emaw, rel emaw chuan kal ila, Mizoram atanga kan zuk thlen tawp, India ram chhimtawp Tamil Nadu-a khawmuala khaw hnuhnungber Kanyakumari zuk thlen nan hian hun a duh piah lamah India ropuina tichhiang turtawn tur a tam hle ang. Mizoram atang hian lirthei hmangin chhuak ta ila, Bengali tawng hmanna Silchar kan paltlang ang a, chutah tawng dang hlak hmanna Meghalaya paltlang leh a ngai, chutah Asamese hmanna Assam mainland paltlang a ngai. Chumi hnuah West Bengal kan lut leh ang a, chumi hmuna an tawng hman tur chu hriat sa. Inbunna nghet atana ruat hi Kerela khawpui Thiruvananthapuram (Trivundrum tiin kan ziak tawh ang) a ni. Chumi pan tur chuan Kolkata atangin kan chhuk leh fe a ngai a, Oriya tawng hmanna Odisha paltlang a ngai, Hindi hmanna Chhatishgarh bakah tawng har taka sawi Kanada tawng hmanna Telangana leh Andhra Pradesh bakah Karnataka a la awm cheu. Hei hi India ropuina pakhat chu a ni?

Heng zawng zawnga buaina hi kan pumpelh ta hlauh a, kawng (road) chu sawi loh rel pawh zawh lovin thlawhna hmangin kan tum ram hi kan thleng ta zawk a, India ram ropuina leh danglamna, tawn loh tam tak kan neih phah. A lehlam chuan a hahdamthlak a, a awlsam phian. Lengpui atangin Kolkata kan thlawk a, hetah hian zan kan riak. Kolkata atang hian Tamil tawng hmanna state Chennai kan thleng leh a, darkar hnih vel thlawhna dang kan ngah hnuah Trivundrum kan pan leh a, kan thlen fel hun kha a chawhnu her hret. Thlawhnaah hi chuan English a hman theih a, hmanna tur erawh a tam lem lo thung.

India chhim lam state hi ram upa tak tak an ni a, an tawng (language) pawh dah sang tak an ni vek a; mahse, an tawng hi sawi tawh angin har tak anni deuh vek. Kanada hi chuan Hindi a pawl deuh a, Tamil leh Kerelian tawng Malayalam phei hi chu har tak a ni. Anmahni chenchilhtu, an mi leh sa lo te pawhin an hman pui hleih theih loh a nih avang hian English an hre phian a, zia tak a ni. Hindi an thiam bik lo hle.

Hnam upa tih takah hnam induh an ni a, chutih teh vakah mi dang an ngai lem lo, an sumdawnna kalphungah pawh an nghet tih a hriat a, dawn ang chi; tlawm dil tih ang chite hi an nihphung a ni lo a, an chhiar zat kha chu an chhiar zat a ni mai. Mi dang hi a hranpa pawhin an ngaichang tehchiam lem lo niin a ngaih theih - an khawsak zula awm kha kan tih tur a ni ber mai.

State tam zawk leilunga kan paltlang tak loh avangin Kerala leh Tamil Nadu state thil te chu kan zuk zir chu a ni ta ber a, chinchhuak a zir hman kan ni lo a, chutih rualin an dinhmun leh kan dinhmun erawh inang lohna a tam a, kan entawn theih an nih lohna a tam piah lemah kan ram thuthmun a inan loh em avangin kalphung pawh a danglam a, chutih rualin an neih anga mi dang hip tura hma an lak dan erawh an entawntlak.

Kerala bik hi state danglam an ni a, tun hnai mai ni lo, tun hma atang daih tawha state danga hna zawnga chhuak nasa an ni a, kan Mizoramah ngei pawh tun hma atangin anni hnam te hi kan hmelhriat. Tunah phei chuan India mai ni lo, state pawnah hna thawkin an chhuak nasa hle a, a nawlpui hi middle-east lamah an fehchhuak nasa a, US leh Europe ram lamah hnathawk an tam hle bawk a, ram dang atanga sum an lakluh tamna hi an state dinhmun that chhan pawh niin an sawi. Kerala hi coconut tamna a ni a, mi hriat dan pawh a ni a, mahse, he state-ah hian cocunut lo tur an tam tawh loh avangin coconut a to phah, an ti (A awmzia chu tunhma lama lo thinte ram dangah an feh chhuak nasa).

India chhim lam tlawha hun kan hman chhunga kan thil tawn atanga sawrkar tan pawha hma lak tula ka hriat chu Thiruvananthapuram atanga kilometer 100 chuanga awm, Beekeeping Consortium & Training Centre, Kerala State Horticulture Production Corporation (Horticorp) kan tlawha kan thil hmu kha a ni. He hmun hi India rama khuai khawina park hmasaber niin anni lam hian an sawi a, (India rama hian khuai khawina hi chu a tam a, mahse, he park-ah hi chuan khuai chaw tur pangpar te an phun vek avangin ‘Honeybee flora park’ an ti deuh kher a, hmasaber an tih chhan pawh a ni) Thil dang chu enga pawh chu ni se, a enkawltu lam an hna lama an chiang lutuk kha a ni ber. An state chawlh, February 21, 2021-a tlawh kha kan ni a; mahse, Mizoram atanga kan sawrkar hruaitute ngenna avangin hemi ni hian chawlh pawh ngaihtuah lovin min lo dawngsawng. Kha hmuna an management lam ten an hnathawh an tui zia kha an hlawhtlinna pakhat chu a ni ngei ang. Kan man phak loh leh tuipui phak loh lam kha a tam lutuk a, kan phurh tur kha kan phur zo lo a ni mah zawk.

He khuai khawina hmun hi en mai chuan hmun chhuanawm a ni hran lo a; mahse, he hmun thlen chuan sawi ang hian khuai bawm tur chi pangpar chi hrang a tam a, a season a zira inpar chhawk te an ni, khaw chhung a nih avangin khuai hi an khawi luai luai lem lo a, bawm lian lem lovah khuai chi hrang hrang, a bul hnaia tana hnawksak lo tur tam lo tete hian an khawi nual a, chung zingah chuan keini pawhin khuai zu kan lak ber Khawivah pawh a tel a, Khuaite telin. An khuai khawi dan hrang hrang hi chu thu hran ni se, he hmun kan thlen tirha projector hmanga Kerala tribal hovin khuai an lak dan document min thlir tir khan ngaihtuahna a ti thui.

Mizoramah hian tlang sang tak tak kan nei a, heng hmun khawkrawk leh sang tak takah hian khuai chi hrang hrang an lawi a, thenkhatte hi ‘A No’ kan ei chite an ni a, a then hi a ‘Zu’ kan lak thinte an ni. Mahse, Mizote hian kham tam taka khuai te hi kan umzui ngai lem lo a, an zu emaw an no emaw kan laksak tam lo hle, lak awmsama an awm a nih loh chuan. Amaherawhchu, heng Kerelian tlang mi (tribal)-hote hi chu hmasang atang tawhin khampang sang tak tak leh thingler sang tak taka khuai zu hi an la thin tih a takin document hmangin kan thlir a, khuai bu awmna an chhui dan leh an zui dan te hi Mizo khuai no zawng te zawn dan nen a danglam thui bik lo, hlawhtling tura an thawhchhuah dan erawh a inthlau. An khawizu lakna hmun angah khan ‘Khuai No/Zu’ hi la ta ila, khuai no/zu hi a to duh khawp ang, an tha thawh ngaihtuah khan.. tih te ka ngaihtuah mai mai… Chumi piah lamah harsa tak leh hlawk taka khawizu an lak dan ngaihtuah khan kum khata Khawizu KG nuai 16 chuang thar thei Kerala tan hian an thawhtlawk viauin a rinawm. Ni tina enkawl ngai lo khuai khawi mi 1,50,0000 zette mihring chepna khutiang state-ah an hlawhtling thei a nih chuan keini state, par tin vulna rama kan chhalah hi chuan hlawhtlinna kawng a inhawng thui ngawt ang, tih ka ring ve ngawt…

‘God own Country’ tiin Kerala hian an state hi khawvel hriatah an pholang a, hei hian India mai piah lamah ram dang atangin khualzin a hip a, an state sum lakluhna tha a tling. Heng zingah hian 'Backwater' tiha an sawi mai, tuifinriat an ri (boundry) hnaia tuifinriat tui an khawmuala an lakluh, tuifinriat Litengsawl (lagoon) an siam hi an hming thatpui leh khualzin an kipna pakhat a ni. An ram chhunga lui lung leh dil te tuifinriat tui nen an thlunzawm a, an tlangram kuam chu dil lian leh zau takah an chantir a ni ber a, hei hi fan tham a tling a, a kam leh lam Arabian sea a lo ni zel bawk nen, fan a manhla hle. Chutihrualin an tribal ho chet tlatna, heng tuipui kam erawh an humhalh tha hle thung a, mi nazawng tak chuan tlawh an phal leh chuang miah lo.

Heng Backwater an tih te a danglam em em chhan chu tuifinriat tui ring si a, tuifinriat tui phul bulh bulh awm si lo a, hahdam taka tuipui khawvel tem theih a nihna hi a ni a, nawmchen zawng pawh a nuam tur hmun tam tak tak he tuipui siamchawp kamah hian a awm a, chumi piah lamah chuan tunhma lama ramhnuai thin, tuiin a chim tak avanga hmun danglam tak lo ni ta te hi tlawh ti manhla tu a ni a, ramhnuaia tuia leu kualna hi a tam lo khawp ang. Backwater-ah hian thuthnum (station) hrang hrang a awm a, a bik taka enkawl tura thlan travel agent ten an enkawl zel a, tourism atanga sawrkar sum hmuhna tha tak a ni bawk.

Kerala hi polythene khapna a ni a, an khapna hi a la rei lem lo a, chuti chungin an zawm tha tih a hriat, thil lei reng rengin a kenna tur ken loh chuan inpawm tun tun a ni mai. Polythene min pek hi zuk tum chhin aih hlawm lova, a hman tawh loh paih pawh hmuh tur a awm lo. He state hi tlangram tih dawn a, ni chiah si lo, phai ni chiah si lo a ni a, hei hi an khua vel a fai chhen ber pawh niin ka ngai, India ram hmun ka tlawh ve tawh ho ngaihtuah chuan Kerala leh Tamil Nadu-a kan tlawh chin hi a fai pangngai hlawm fu a, phai rama ninawm khawpa tam Thosi leh Vaihmite an tam loh chhan hi a boruak ro piah lamah kawng sir tui tling a awm meuh loh vang a nih kan ring ngawt. Ka ngaihtuah fo thin erawh, keini Mizote hi phaia cheng hi ni ila, kan trawp awm tih hi zuk ni tlat a…Kan kawng zawl neih te hi khawi hmunah pawh tui tlinna hmun a ni tlat zel alawm.

Kanyakumari-ah hian ngatinge thlawhna tum hmun a awm loh? ka hre lo… darkar 5 vel kha hmuna ka cham chhung khan zawh tur ka hriat fuh chu kha lai hmuna dawr nei kha an ni mai a, anni chuan tourism system-ah an ngai. Ngaihdan leh landan atanga chuan Kanyakumari hi foreign tourist tan panna chhan tur a awm lem lo a, India chhimtawp khaw tawp ber a nih vang erawh chuan Indian tan chuan a hlu hranpa riau tih a lang. Kerala lam leh Goa lam vaukamah te foreign tourist inpho thin an tam viau laiin Kanyakumari-ah hi chuan chutiang chu an awm lo, a vaukam pawhin a hip lo bawk. Tui fawn so bulh bulhin a nek reng a ni a, a vaukamte pawh a ko ber bur a, hahchawlhna tur a awm mumal tlat lo a ni. Indian-te tana kan chhim tawp kha a hlutna zawng, chu zawng chu… A boruak danglam tak erawh a tem lo tan chuan a hlutna a tam lem lo maithei a ni.

Kolkata leh a pelha ka thlen china ka chhinchhiah thin erawh Zuk leh Hmuam lama an fihlim viau thin hi a ni. Mei zu leh hmuam hi hmuh tur an awm meuh thin lo a, kuhva ei hmuh chang te lah hian a ei-a te hi engah vak an ngaih loh ho hi an ni deuh zel mai hian ka hria. Zuk leh hmuam hmuh tur an vang thin em em laia Zawng (Monkey) an ngampa lutuk thin erawh hi chuan ka awm hi a ti nuam lo fo thin a, tun tum ka zin erawh Zawng pakhatmah ka hmu lo a, a fihlim thlak phian…