India coach hlui, Igor Stimac-a chuan a team hlui chungchang a sawi chhuak leh ta a, tun tum chu a lawmawm lam pawh telin mi mal hming a lam chhuah zingah Mizo forward Edmund Lalrindika pawh a tel a, a fak a, a lakah beisei a nei sang tih a sawi.

Stimac-a leh All India Football Federation (AIFF) chu thla hmasa tawpah an inthen fel tawh a, a hnu lamah Croatian coach hian a kalsan tak team chungchang hi a a sawi zui nual tawh a, a tam zawk chu India tana chanchin ngaihnawm loh a ni.

I-League-a Inter Kashi tana khel, Edmund-a chungchang erawh tun hnai khan Stimac-a hian Chakde Football Podcast-ah a sawi chhuak a, a lawmawm lam niin, “Player tha bik a ni a, ka duh berte zinga mi a ni,” a ti.

A la duhtawk mai lo va, kum 25 mi hi fak zuiin, “Kum nga ka awm chhungin ka player hmuh hrang hrang zingah hun reilo te chhunga min hneh ber a tling a. Enchhinna a paltlang vek a, ‘top five’ a ni vek a; khawthlir leh hawi lam danglam bik nei a ni,” tiin a fak nasa hle.

Edmund-a hian Indian football season chawlh chhung hian inzir turin Canadian Premier League club, Atletico Ottawa-ah a kal dawn a. Hemi chungchang pawh hi Stimac-a chuan sawiin tha a tihpui thu a sawi.

“Indian Super League (ISL) atanga sawmna a hmuhte hnara ram danga kal a duh zawk hi hmasawn zel duhna rilru tilangtu leh a hmaa chona awm a hmachhawn tih tihlanna a ni a. A rilru lama hma a sawn zelna hi pui ka ti a, national team hian hetiang rilru hi a mamawh a. Hlauh a nei lo va, a thiam a, hmasawn zel turin inkhelh tam chauh a mamawh,” a ti.

Edmund-a hi I-League 2023-24 season liam ta kha a khel tha hle a, inkhel vawi 24-ah inlan goal li thunin a thiante thun tur vawi riat a siamsak bawk.

A chet that avang hian a vawi khat nan India tana khel turin Stimac-a hian a bân hma lawk khan kovin June thla tir khan Fifa World Cup qualifier-ah Kuwait hmachhawnin a vawi khat nan ram tan a inlan a ni.

Edmund-a hi amah neitu tak chu Bengaluru FC niin Inter Kashi-ah hian loan-in a khel chhuak a. Mizoram pawn lama a football nun hi AIFF Under 18 team-a a tel atanga tanin kum 2017 khan Bengaluru FC Reserve Team a zawm zui a. Kum hnih huah senior team-ah kaiin East Bengal leh tuna thiah leh tawh, Indian Arrows-ah loan-in a lo khel chhuak tawh bawk.