India hmarchhaka cricket-in hma a sawn theih nana association hrang hrang intelkhawmna chuan huang hrang hranga player tha ber an thlanah Mizo pahnih - Johan Lalbiakkima leh Thelma Laldinthari te an tel.

Zirtawpni zan khan hmarchhak state hrang hrang association telna, North East Cricket Development Committee (NECDC) chuan a vawi hnih nan Achiever’s Nite an hmang a. Cricket Association of Mizoram (CAM)-in Aijal Club-ah a thleng.

Season liam taa India hmarchhak state-te tana ram pum huap intihsiaknaa che tha ber an thlan hnena lawmman an semah Ramhlun Venglai Cricket Club-a khel lai, Johan-a chu Under 16 Boys’ Best Bowler Award hlan niin Ainawn Veng tleirawl, Thelma-i chu Under 19 Women’s Best Bowler atan thlan niin chawimawina hlan an ni.

Mizo zinga hmasa pahnih
NECDC hian nikumah khan Achievers’ Nite hi an lo hmang tawh a, hetah hian Mizo player zingah chawimawina dawng pha an awm lo.

Kumina a vawi hnihnaah erawh Mizo cricket leh CAM tan hun duhawm a her chhuak a, Johan-a leh Thelma-i hi hmarchhak huapa chawimawina dawng thei an ni ta a. Mizo zinga a hmasa ber an ni ve ve tihna a ni.

Vijay Merchand Trophy-a che tha Johan-a
India hmarchhaka mipa kum 16 hnuai lama ball vawm thiam ber, Johan-a hian a chawimawina dawn chhan ber hi Mizoram tana a fehchhuahnaa Board of Control for Cricket in India (BCCI)-in kum 16 hnuai lamte tana a buatsaih, Vijay Merchant Trophy-a a chet that vang a ni.

Kum 16 mi, off spinner hian season liam taah khan Mizoram Under 19 tan a feh chhuak a, an khelh zawhah Chhatisgarh khawpui, Raipur-a Vijay Merchant Trophy-a khel mek Mizoram team chu a zawm nghal a. Vawi nga an khelhah a tawp lam vawi thum chauh khel hman mah se wicket 14 lai a la hman a ni.

Kum 12 mi lek a nih lai atanga cricket khel tan, Johan-a chuan a chawimawina dawn hi Pathian vang a ni tih a sawi a, Under 19-a amah kaihruaitu coach-in thil tam tak a zirtir avang leh Under 16 khel leh nghal thei tura remchanna petute chungah lawm thu a awi a. A khelhpuite zawng zawng chungah lawm thu a sawi bawk.

Johan-a hi Mizorama cricket inpui tih theih hial, Ramhlun Venglaia cheng leh khawsa a ni a, a khel hmain theihna pawh a nei sang a. Mizoram tan hian kum 13 mi lek a nih laiin Under 16-ah a khel phak tawh a, kum 15 a nihin Under 19-ah a khel tawh bawk a. Tunah pawh an veng club tan hian senior team-ah player thawhhlawk ber pawl a ni tawh.

Ainawn Veng atangin Thelma-i
2022-23 chhunga kum 19 hnuai lam hmeichhiaa ball vawm thiam bera thlan, Thelma-i hi an veng, Pacers Cricket Club-a khel lai niin medium pacer a ni ve thung.

Season liam taah khan Mizoram tan CAM chuan Chandigarh-ah Twenty20 leh Madhya Pradesh-a One Day Indoor-ah feh chhuakin a chet that avangin lawmman a dawng.

Kum 19 mi, Thelma-i hi climbing lamah pawh a tui hle a, a theihna hmua cricket khel tura sawm chawp niin kum 2019 vel atang chauh khan cricket hi a khel tan a. Tunah erawh India hmarchhak puma a rualpuia ball vawm thiam ber a ni tawh.

ZALEN-in a biaknaah lawmman a dawn theih chhan chu hriselna tha tak petu Pathian vang a nih thu a sawi a, “Ka chhungten practice-na hun tha min siamsak thin a, khelhpui tha tak tak ka nei bawk a. Association-in inbuatsaihna hun tha tak  min pek vang a ni bawk,” tiin a sawio.

Nasa lehzuala inbuatsaih a ngai tih a sawi a, “Cricket-ah Mizote hi kan la hniam avang hian nasa taka inbuatsaih ka la ngai a ni,” a ti.

Mizoram cricket-in hma a sawn
CAM-in NECDC Achiever’s Nite a thlen hi Zoramthanga, Chief Minister, Mizoramin a hmanpui a. Hemi hma hian tlai lamah NECDC Conclave vawi riatna hman a ni bawk a. Arunachal Pradesh, Sikkim, Manipur, Meghalaya leh Nagaland atangin cricket association aiawhte an tel.

Mizoramah cricket hian hriat a hlawh lutuk ngai lo va, CAM hi kum 1992 daih tawha din ni mah se kum 2018-ah BCCI-a a inziah luh theih chauh avangin hruaitute tan pawh hmalak chak a har hle thin (BCCI-ah hian association din ruala inziah luh ngawt a remchang lo va, tih tur tam tak a awm avanga inziak lut mai lo a ni).

BBCI-a a inziah luh hma atang tawha theihtawpa beihnain rah tha chhuah zelin tunah hian CAM leh player-ten hma an sawn hle a. Tun hnai lawkah Ramhlun Venglai Cricker Club batsman Joseph Thankhuma chu Duleep Trophy-ah North East Zone aiawh tura thlan zingah a tel a, North Zone nena an inhmachhawnah a khel phak zingah telin Mizo zinga he intihsiakna sanga inlan thei hmasa ber a ni ta nghe nghe.

Duleep Trophy khel tur hian a hma pawhin Mizoram player thlan an lo ni tawh thin a; mahse, khelmual tak erawh an lut pha ngai lo.

Kuminah hian Deodhar Trophy-ah pawh hian CAM chuan mi pathum ngawt a thawh chhuak leh dawn a, Chhinga Veng Cricket Club wicketkeeper/batsman Jehu-Anderson bakah Vikash Kumar, Electric Veng chu stand by-ah a tel a. North East Zone team manager atan CAM-a Men’s Selection Committee Chairman ni lai, Raj Kumar Joshi chu a tel dawn bawk.

CAM hian Sihhmuiah Suaka Memorial Cricket Ground sual chhuak tawhin tunah hian an president, Lalrochuanga Pachuau te chhungkuain ram an pek, Tanhrilah a dang sa leh turin bul an tan leh mek tawh bawk a ni.