Season khat chhunga Mizoram pum huap badminton inelna ngaihhlut ber leh lian ber, Mizoram Badminton Association Official Championship 2023 - Senior chu Thawhtanni hian Bawngkawn YMA Hall-ah khelh tan a ni a, India ram pum huap langsar pha Mizo player-te pawh an inlan dawn.

Ngaihhlut hlawh
State championship hi ngaih pawimawh a nih avangin Badminton Association of India (BAI) pawhin calendar-a a dah a ni a. Chhun lamah chauh khelh thin a ni dawn a, en man chawi ngai lovin a en theih dawn a. Inrinni thleng a awh ang.

Category panga - Men’s singles, Women’s singles, Men’s doubles, Women’s doubles leh Mixed doubles-ah te inelna neih a ni dawn a. MBA-in ranking system a kalpui danah official championship hian double point a pu a, lawmman sumfai tamna ber tournament a ni tel bawk a, hei vang hian ngaihhlut a hlawh.

An haw khawm e
Ngaihhlut a hlawh avang hian Mizoram pawna inzira awm mekte pawh he tournament-a inlan tur hian an haw phalsak an ni a. Pullela Gopichand Badminton Academy (PGBA) leh ITM University Badminton Academy-a zirlai Mizo naupangte pawh an haw khawm. 

Hei mai a ni lo va, MBA-in a thawhpui, Tata Trust leh PGBA-ten Mizo naupang inzir mekte an inzirnaa insawr bing tura an duh avangin season khat-ah state level tournament pakhat bak an khelh a rem ti tawh dawn lo niin a lang a. Hei vang hian heng academy-a Mizo player-te hi an khelh châk ber championship khel tur hian an haw a ni. 

India rama hriat hlawh inlan dawn
Phaia inzira awm zingah India ram pum huapa champion ni tawhte pawh Mizorama haw zingah hian an tel.

Under-17 Boy’s Singles category-ah All India Sub-Junior Ranking Badminton Tournament-a kumin chhunga vawi hnih champion thei, H. Lalthazuala, Ralte Villa Badminton Club (RVBC) pawh Men’s singles huanga inlan turin Inrinni khan Aizawl a thleng.

Under-15 category-a vawi khat national champion ni thei, vawi khat dang final lut thei bawk, Malsawmhlua (Mama), RVBC pawh Men’s singles leh Men’s doubles category-a inlan turin a haw bawk.

Anni pahnih bakah hian Lucknow-a neih zawh taka Under-17 Boy’s Doubles Semi-finalist, C. Lalramsanga, RVBC pawh heng category pahnihah tho hian a inlan dawn bawk a ni.

Mizoram No. 1 vs India No. 1
Tournament ngaihhlut hi inlan turte avangin a hmuhnawm dawn. 

Mipa lamah Malsawmsanga (Esha), Bawngkawn Badminton Club (BBC) chu Seeded No. 1 niin Men’s singles category-ah a inlan dawn a, Thazuala nen an inhmachhawn thei dawn.

Esha hi first round a bye-a, Thazuala’n first round-ah a tumpui a hneh chuan second round-ah an intum dawn a. Mizoram Men’s singles No. 1 leh India Under-17 No. 1 te inhmachhawn dawn tihna a ni.

Men’s singles category ah hian player 60 zet inlan tura ngaih a ni a, Mizorama player tha zawng zawngte an inlan kim vek dawn tihna a ni ber.

Category dang pawh a lian
Women’s singles-ah Abigail Lalthazuali, Saron veng Badminton Club chu Seeded No. 1 a ni a, Lalrinhlui, RVBC chu No. 2 a ni thung a. Hmeichhe maltana inlan turte hi thalai sengsawng, kum 15-22 inkar vek an ni.

Men’s doubles-ah Laldintluanga Tlau leh Lalrinawma (BBC) te tangdun chu Seeded No. 1 an ni a. Tun dinhmunah tha ber anga chhal ngam ni mah se tun hnai lawka district level tournament-a an hneh zawh loh, Subam Yadav leh Steven Lalhriatpuia, Chanmari Shuttler Club (CSC) te an hmachhawn thei dawn a, an kawng a khirh dawn.

Hei bakah hian C. Lalramzuava leh Joseph VL Ringngheta, CSC te Seeded No. 2 niin senior player chuai thei lo, Lalmuanawma leh Samuel Lalnunmawia, Mizoram Police BC te No. 3 an ni bawk a. Anniho hi Rinawma te thian dun champion-na kawng daltu ni thei vek an ni.

Women’s doubles-a senior player inlan tur karah Lalrinhlui leh Zothansangi, RVBC te tangdun chu Seeded No. 1 an ni a. Mixed doubles-ah Laldintluanga Tlau, BBC leh Zorinkimi, Chaltlang BC te Seeded No. 1 an ni bawk. 

Pafa zain inlan dawn
MBA Official Championship 2023-ah hian pafa zaa inlan tur pawh an awm a, tournament tingaihnawmtu a ni a. Malsawmkima (Maski-a) te pafa thum, Mission Veng Badminton Academy an inlan dawn.

Maski-a hi kum 53 a ni tawh a, a fapa, kum 13 mi, Vanlalhriatrenga nen Men's singles-ah an inlan dawn a, a tel thei upa ber leh naupang ber an ni dawn.

A fanu, Lalrinkimi pawh Women’s singles inelna a hmachhawn dawn bawk a. Pafa zaa an inlan tur hi Mizoram badminton chanchina chhinchhiahtlak tak a ni tih MBA chuan a sawi.