India chu Asia khawmualpuia football thiam ram 18-na niin July thlaa a nih tum a hlen a, Fifa World Cup 2026 khel tur zawnnaah Round 1 khelh hah ngai lovin ram lian zawk dangte nen Round 2 an nghah a ngai dawn ta.

Ningania Fifa-in ranking a tihchhuah tharah India hi point 1,208.69 hmuin thla hmasaa a dinhmun atanga pakhata hma sawnin No. 99 a ni ta a. Asia khawmualpuiah ram 47 zingah No. 18 a ni ta bawk.

A tum a hlen, a hahdam thei
India hian June thla laihawla Intercontinental Cup an khelh hma khan July thlaa ranking tihchhuah turah dinhmun sang zawka kaia Asian Football Confederation (AFC) rama a tha zinga tel a tum a, a tum a hlen ta a ni.

A tum a hlen takah chuan USA, Mexico leh Canada ramten kum 2026-a World Cup an thlen tura Asia atanga khel zawnna turah round hmasa ber atanga bul tan a ngai dawn ta lo tihna a ni a. Round 2 atanga a inlan ve hunah pawh ram huphurhawm thenkhat a hmachhawn loh theih phah dawn bawk.

A tum hi hlen lovin Asia-a ranking hniam ram 18 zingah tel sela chuan Round 1 khelin a chak pakua zinga a tel chauhvin Round 2-a khel thei dawn tihna a ni a. Chu chu khelh hah ngai lovin a paltlang a, Round 2 khelh dan tur hi July 27-ah pawh a ni ang.

Round 2 khelh tur pawh turah hian India hi Pot 2-ah awmin Uzbekistan, China, Jordan, Bahrain, Syria, Vietnam, Palestine, leh Kyrgyz Republic te nen an awm a. Heng ramhi a hmachhawn dawn miah lo tihna a ni.

Round 1-a chak ram pakua chu Pot 4-ah an awm dawn a ni.

Sang vanglai la phak lo
India hi Fifa hnuaia mipa football khel ram zingah No. 99 a kai ta a. Blue Tigers hian thla hmasaa Intercontinental Cup leh SAFF Championship nomawi an lak a chhawr tih a lang a; mahse, an san vanglai an la phak lo.

Fifa ranking-ah hian February, 1996 khan India hi No. 94 a lo ni tawh a, hei hi a thlen san lai ber a ni a, tunah hian dinhmun pangain a la phak rih lo tihna a ni.

Tun hi kum 2018 hnu lamah No. 100-na hnuai lama a awm leh hmasak berna a ni a. Kum 1996-a No. 94-na a nih hma, kum 1993 khan No. 99 hi a lo ni tawh a, 2017-ah leh 2018-ah No. 96 a lo ni tawh bawk.

Igor Stimac-a team hian September-ah Thailand-ah King’s Cup an khel leh dawn a. A thlengtu bakah Iraq leh Lebanon pawh an tel dawn a. October-ah Merdeka tournament-ah inlanin Palestine, Malaysia leh Lebanon an inlan ang.

A thiam ram 10 inthlak lo
Fifa ranking tharah hian a chung lama awm ram 10-te chu an dinhmun a inthlak lo va, European leh South American team-in an luah khah.

World champion Argentina chuan a chung ber dinhmun an la luah chhunzawm a, France-in dawtin Brazil chu pathumna an ni a. England, Belgium leh Croatia ten an dawt leh.

Asia khawmualpui atangin Japan chu a sang ber niin No. 20-ah an awm a. Iran (22), Australia (27), Korea (28) leh Saudi Arabia (54) ten dawtin a sang panga an luah khat.

A hniam lamah hmasawn an awm nual a. Cayman Islands chu dinhmun palia hma sawnin No. 193-ah an kai a. Anmahni ang bawkin Gibraltar chuan palia hma sawnin No. 198-ah an awm a. Liechtenstein pawhin dinhmun pali bawka hma sawnin No. 200-na an ni.