Lionel Messi-a leh a thiante, world champion team-in Asia an tlawh a, an thlen china an thawm natzia kan hria. Khawchhak lama kan Asian-puite tawn ang kha tawnga hmu ve thei kan lo ni reng mai a, a nihna taka sawi phei chuan ‘kan hnawl hnu an lo chang mai mai zawk’ a lo ni reng mai.

Ni e, Messi-a hova Argentina team zin chhuak hian China leh Jakarta an tlawh a, kha inkhel pahnih kha India leh Bangladesh-a khelh tum an lo ni zawk reng a; mahse, world champion meuh thlenna tur sum a hautak em avangin Asia chhim lam ram rethei pahnih hian an lo hnar mai mai a lo ni.

Argentina hian nikum Fifa World Cup-a an champion tum khan Asia chhim lam ram hnih atanga thlawpna an dawn that em avanga lawmthu sawi nan tun laia ram leh ram inkhelh hun awmah hian tlawh an duh a, thuneitute pawh an dawr.

“Argentina FA-in friendly khelhna turin min dawr ngei a; mahse, senso a san em avangin kan ‘aw’ thei ta lo,” tiin All India Football Feberation (AIFF) Secretary General Shaji Prabhakaran chuan Thawhtanni khan Times of India hnenah a sawi mauh mai, retheih hi a va pawi em!

“Hetiang inkhel thleng tur chuan thawhpui tha tak neih a ngai a, Argentina mikhual tur hian sum a ngai tam a, kan football sum dinhmunin a tlin lo a ni,” a ti.

Argentina FA aiawha AIFF dawrtu hi international relations hotu, Pablo Joaquin Diaz a ni tih a sawi bawk.

December thlaa Qatar-a World Cup an lak hnuah khan Messi-a telna Argentina hi khawvela football team-ah chuan sawmtu ngah ber an ni mek a, vawi khat khel tura senso ngai zat erawh India pawisa chuan Rs. vaibelchhe 32 leh 40 inkar daih a ni thung.

Argentina hian India leh Bangladesh-a friendly match khelh an duh a; mahse, hun reilo te chauh inbuatsaihna awm a nih avangin sum mamawh an nei hman si lo va, an hnawl ta ve ve ringawt a. Ningani khan Beijing-ah Australia khelin Thawhtanni khan Jakarta-ah Indonesia nen an inkhel leh ta bawk a ni.

Messi-a te thianho hian India tlawh pawh ni se Fifa ranking-ah an dinhmun a inthlauh em avangin mual neitu nen chuan an inhmachhawn kher erawh a rinawm loh va. Anni No. 1 an nih mek laiin indawr lai vel hian India chu No. 101 a ni daih a ni.

“India nena an inkhelh chuan an inthlau leh lutuk dawn a ni,” tiin Prabhakaran chuan a sawi.

Argentina hian kum 2011 khan India an tlawh tawh a, hemi tum pawh hian Messi-a hi captain niin Kolkata-a Salt Lake Stadium-a mi 85,000 hmaah Venezuela an hneh.

Hetih hun lai hi Messi-a vanglai intan tirh lam kha a la ni a, tunah erawh chuan football khawvela nomawi ngaihhlut ber kawltu ni chunga lo kal tur a ni tawh thung a, a uiawm hle a ni.