Thawhlehnia Guwahati-a India leh Australia ten Twenty20 international an khelh tura match observer atana ruat, Zosangliana chuan Pathianni khan an khelhna tur thlengin a tih tur hrang hrangte a ti nghal.

Australia hian Ningani atang khan India hi an chamchilh mek a, T20 international vawi nga an khel dawn.

Thawhlehni zan hian Assam khawpuia Barsapara Cricket Stadium-ah a vawi thumna an khel dawn a, hetah hian khelmual chhunga umpire tih lohva inkhel zawng zawng enkawltu turin Armed Veng pa, Zosangliana hi thlan a ni.

Pathiannia Guwahati a thlen ruala a hna tan nghalin khelmual a endik nghal a, a tul ang angte a enfiah hnuah Thawhtanni hian state hrang hrang chanpual tur ticket (quota) a sem zui lehnghal dawn bawk.

Cricket-ah hian inkhel pakhat atan match observer pakhat chauh ruat thin an ni a, mawlmang taka sawi chuan inkhela a ‘thu ber’ tih theih an ni a, pindan pawh a hrang pek an ni a. Khelmual chhungah umpire-in inkhel a enkawl a, a bak zawnga khelmual leh a chhehvel thlithlaia tul zawng zawng buaipuitu an ni.

ZALEN-in Pathianni zana a biaknaah Zosangliana chuan, “Inkhel tur team hnihte thil tul zawng zawng ngaihtuah a ngai a, an thlenna hotel leh dressing room-ah harsatna an nei em tih thlengin ngaihven a ngai a. Technical lam zawng match referee-ten an buaipui a, a bak inkhel chhehvel zawng zawng kha ka kut tur a ni,” a ti.

Inkhelh lai pawhin khelmualah harsatna awm se, ruah pawh sur se observer-in a ngaihtuaha hma a lak a ngai vek bawk tih a sawi.

“Entir nan, inkhel hi Pepsi-in an sponsor a nih chuan team pahniha miten Pepsi ni lo an keng lang thiang lo va, an lo in duh emaw, an lo inchhawp duh emaw a nih pawhin puan emaw, thil dang emawa lang lo tura an thup a ngai a. Chutiang thleng chuan viltu tur ka ni dawn tihna a ni,” tiin match observer hna leh pawimawhna a sawi.

Inkhelh zawhah hian report ziaha thehluh a ngai dawn bawk a, phek 20 vela chhah report form awm sa hmanga ziakin thuneitu sang zawk hnenah a thlen leh dawn a ni.

Mizorama cricket-in hma a sawn theih nana nasa taka lo thawk tawh thin, Zosangliana hi Cricket Association of Mizoram (CAM)-ah kum 10 zet treasurer lo ni tawh a ni a. Ani hma hian CAM atang hian general secretary kal ta, Mamon Majumder leh president ni mek, Lalrochuanga Pachuau te chu international match enkawltu-ah an lo tang tawh.

CAM chuan Board of Control for Cricket in India (BCCI)-in an mi leh sate ring zova international match hial a enkawltir thin chu an chunga an lawm thu an sawi.