Thomas Cup final-a vawikhat luhna India leh tum 14 champion tawh Indonesia ten final an khel a, Lakshya Sen, Satwiksairaj Rankireddy-Chirag Shetty leh Kidambi Srikanth ten an tumpui theuh hneh vekin India mipa badminton team te chuan Indonesia 3-0 a hnehin a vawi khat nan Thomas Cup title an la.

Thomas Cup Final Pathianni chawhnua khelhah hian, first singles-ah Lakshya Sen leh Anthony Sinisuka Ginting te inhmachhawnin game hmasa 8-21-a a hlauh hnuah awlsam ang reng takin 21-17, 21-16-in Sen chuan hnehna a chang. Satwiksairaj Rankireddy leh Chirag Shetty te tang dunin Mohammad Ahsan leh Kevin Sanjaya Sukamuljo te 18-21, 23-21, 21-19-in first doubles match-ah an hneh ve leh bawk. Kidambi Srikanth chuan Jonatan Christie chu 21-15, 23-21-in second single an khelhah hneh ve lehin India mipa badminton team te chuan a vawi khat nan Thomas Cup 2022 nomawi an hum haw thei ta.    

First singles Lakshya Sen leh Anthony Sinisuka Ginting te inkhelah hian inkhelh tantirh atangin Anthony Sinisuka Ginting a khel tha hle a, harsa lo takin 21-8 in game khatna a la thei. Mahse, Lakshya Sen-a'n tlawm mai a tum bik lo. Game hnihna atangin a rawn indin thar leh a, 21-15 in a rawn hneh let va. Deciding game-ah pawh Lakshya Sen hin harsatna a tawk lutuk lo a, 21-16 in hnehna a chang leh. 
  
Match hnihnaah Indian pair chhuanvawr Satwiksairaj Rankireddy/Chirag Shetty te tang dun leh Mohammad Ahsan/Kevin Sanjaya Sukamuljo te inkhel hi an inhnehtawk hle a, inkhel a hmuhnawmin Satwiksairaj Rankireddy leh Chirag Shetty te fight a hmuhnawm em em a, Mohammad Ahsan leh Kevin Sanjaya Sukamuljo te tang dun chuan hneh let tum ngial mahse an hneh zo ngang lo.

Indonesia pair-te hian game khatna 21-18-in an la a, game hnihnaah pawh an deuce chho zak zak. India pair-te hi an tlawm tawh mai dawn emaw tih hnuah 23-21-in hnehna an rawn chang. Deciding game khelh a ngai ta. Satwiksairaj Rankireddy leh Chirag Shetty te chuan theih tawp chhuahin an khel a, an chak hlauh a nih chuan champion turin chance an nei tha tih an hria, chutiang bawkin Mohammad Ahsan leh Kevin Sanjaya Sukamuljo te thian dun pawhin an result-ah an thian dangte an innghat tih an hre ve bawk. Theih tawp chhuah ve bawk mah se Indian pair-te hi an tlo zawk a, hneh zo ngang lovin 21-19 in an tlawm ve leh. 

Second single khel turin World number 1 hlui Kidambi Srikanth a rawn ding chhuak a, a chak hlauh a nih chuan India mipa team te chu World Champion an ni thei dawn. A hmachhawn tur Jonatan Christie hi player thiam tak a nih vangin a chesual ve thei. Inkhelh an tan a, game khatna chu awlsam takin Srikanth chuan 21-15-in a la mai a, game hnihna erawh harsa takin 23-21 a hnehna chang lehin India badminton tan mellung pawimawh tak an phun thei ta a ni. 

Full Results
First Singles: Lakshya Sen beat Anthony Sinisuka Ginting 8-21, 21-15, 21-16
First Doubles: Satwiksairaj Rankireddy/Chirag Shetty beat Mohammad Ahsan/ Kevin Sanjaya Sukamuljo 18-21, 23-21, 21-19
Second Singles: Kidambi Srikanth beats Jonatan Christie 21-15, 23-21