Aizawl: July ni 17,2017 a India President hlan loawm tur atan Mizoram Legislative Assembly Secretariat an inbuatsaih chho mek a, Mizoram MLA te vote hlutzawng hi 320 a ni dawn. Assembly Secretariat thawktute hnen atanga Zalen thudawn danin July ni 17,2017 (Thawhtanni) zing dar 10 atanga tlai dar 5 inkar chhungin Assembly Committee room-ah vote thlak a ni dawn a. Helai hmunah hian Mizoram MLA te chuan vote an thlak ang a, MP te erawh chuan New Delhi ah an thlak thung ang. Mizoram MLA pakhat vote hlutzawng hi hi 8 a ni a, MLA 40 te vote hlutzawng chu 320 a ni dawn a ni. President thlanna ah hian EVM hman a ni dawn lova, a bika siam ballot box hman a ni dawn a. Ballot box hi Assembly leh Election department aiawh ten July ni 13,2017 khian New Delhi ah lachhuakin an rawn hawnpui nghal ang. July ni 17,2017 a India President thlan loawm turah hian mi pahnih, Central a rorel mek NDA thlawp Ram Nath Kovind (UP) leh eptu party te thlawp Meira Kumar (Bihar) ten chuh turin nomination an thehlut tawh a ni. President thlanna a vote tla te hi New Delhi ah phurkhawmin July ni 20,2017 (Ningani) ah chhiar a ni ang. President thlan turah hian a thlang theitu (elector) 4852 an awm a, heng zinga 748 hi MP an ni a, a dang zawng hi MLA an ni.