ZALEN, Oct. 4, 2024: India ram puma Baptist Kohhran hmeichhe pawl hruaitu lu ber atan Mizo nu thlan a ni.

Thawhlehni leh Ningani inkara Chennai, Tamil Nadu-a India Baptist Women’s Union (IBWU) General Assembly vawi 15-na neihah president atan Rbt. Dr. Zoramthangi, Mizoram Baptist Kohhran Hmeichhe Pawl (MBKHP) hi thlan a ni.

IBWU president thar, Rbt. Dr. Zoramthangi hi Serkawn, Lungleia awm niin BCM Serkawnah rawngbawltu a ni a. MBKHP–ah hruaitu hlun niin Executive Committee member-ah 2015-18 chhung a awm tawh a, kum 2018-24 chhungin finance secretary hna chelhin tunah hian Executive Committee Member a ni leh mek.

Tun tum IBWU inkhawmpuiah hian thupui atan I Thessolonika 5:11 tlawhchhanin ‘I in dawmkang tawn zel ang u’ (Build each other up) tih hman a ni a. A chhim hian MBKHP atangin hruaitute leh member an kal.

MBKHP hruaitute hi chanvo pawimawh tak tak pek an ni a, MBKHP Secretary Nl. Lalhmingmawii Chongthu-in Cultural Night-ah hun hmangin a kaihruai a, Rbt. HK Lallianzauvi, President MBKHP-in seminar kaihruaiin F. Zanguri’n hruaitu boralte sunna hun a hmang a. President thar hian a tawp zan inkhawm a kaihhruai bawk.

Kum 2024-2029 atana hruaitu tur thlan niin hruaitu tharte lawmluhna leh hlanna neih a ni.

Kum 2024-29 hruaitu turte:

President: Dr Zoramthangi (MBKHP)

Vice President: Pulla Sampurna (TBUTWF)

Secretary: Ruth Anand, Bangalore

Treasurer: Bonjera Sangma, Garo