Indian Pool National Championship-ah pathumna nia bronze medal hawlh chhuaktu, Lalrina Renthlei leh a thiante chu Inrinni khan Mizoram Snooker & Billiards Association (MSBA) huaihawtin Mizorama an haw hmuah a ni.

September 1 atanga khelh tan, Indian Pool National Championship (9 & 10 Ball)-ah hian MSBA chuan player pathum tirin Lalrina hian 9 balls inelnaah semifinal thlengin bronze medal a la.

Basketball-ah pawh Mizorama inelna sang bera a thiam ber nihna lo hauh fo tawhtu, Lalrina hian 10 balls inelna zawkah pawh quarterfinal thlengin Laltlansanga, Lunglei chuan round of 16 a thleng bawk.

Daly College, Indore, Madhya Pradesh-a Indian Pool National Championship (9 & 10 Ball) hi Zirtawpni khan khelh zawh niin Inrinni khan Mizoram aiawha kalte hi an haw a, Lengpui Airport-ah hmuahna hun huaihawt an ni.

National championship-ah hian MSBA chuan Lalrina leh Tlana bakah PB Liansangzuala, Dawrpui, Aizawl te a tir a ni.

Tuikhuahtlang tlangval, kum 32 mi, Lalrina hi snooker-ah 2010-11 khan National Junior Champion a lo ni tawh a, India aiawhin senior leh under 21-ah vawi hnih ve ve a khel tawh a. Pool-ah pawh senior-ah tum hnih bronze a la tawh a, India aiawhin vawi hnih a khel tawh bawk.

Basketball-ah pawh a khelhna club leh Mizoram tihmingtha fo tawhtu a ni a. Mizorama basketball inelna sang ber, Mizoram Super League (MSL)-ah pawh vawi nga lai champion nomawi a la tawh.

MSL-ah hian Mission Veng Vikings chu vawi khat champion-puiin tuna a khelh mekna, Zarkawt BCA chu vawi li a champion-pui tawh bawk a. Guard rinawm tak hian player mal chawimawina sang ber, Most Valuable Player (MVP) pawh vawi thum a lo dawng tawh bawk.

Pool khela Mizoram aiawha a feh chhuah mek lai pawh hian Mizoram Basketball Association (MBBA) chuan September 22-24 chhunga Jawaharlal Nehru Indoor Stadium, Chennai, Tamil Nadu-a khelh tur, Basketball Federation of India (BFI)-in 3X3 Senior Nationals Championship-ah Mizoram aiawh tur a thlan zingah an telh bawk.