Serchhip naupang, Pullela Gopichand Badminton Academy (PGBA)-a inzira awm mek, Malsawmhlua (Mama) chu India ram pum huapa badminton inelnaah doubles-ah a kawppui nen an champion.

Pathianni hmasaa atanga khelh tan, Yonex Sunrise 2nd Ashwini Gupta Memorial All India Sub-junior Ranking Badminton Tournament 2023-ah hian Mama hi a kawppui, Andhra Pradesh naupang, Mahendra Kalahasthi nen Under-15 Boy’s Doubles huangah inlanin seeded no. 2 ni chungin inelna hi an hmachhawn.

Semi final lut turin player tha tak tak hnehin, final lut tur zawnnaah Akhil Reddy Bobba leh Abhisek Bonu, Andra Pradesh te tangdun an hneh a. Pathianni khan final khelh niin champion tura rinkai ber (seeded no 1), Arjun Tanaji Birajdar leh Aryan Tanaji Birajdar te tangdun chu 21-14, 21-18 a straight set-a hnehin an champion a ni. 

Mama hi NEIDA (Tata Trust), Mizoram Badminton Association (MBA) leh Mizoram States Sports Council (MSSC) te thawhhonaa badminton zirna atana an din, Serchhip Regional Development Centre (RDC) atanga in zirchhuak a ni, he hmunah hian kum thum a inzir hnuah November, 2021 atang khan PGBA-ah a awm tan a, India rama naupang zinga badminton-a hmabak nei êng ber zinga mi a ni mek.

Ralte Villa Badminton Club, Champhai tana khel mek, Mama a champion hi MBA chuan a chhuangin a lawmpui tak zet tih a sawi a. ‘Mizoram tihmingthaa India player chhuanvawr ni chho zel turin duhsakna sang ber a hlan’ tih a sawi.