Serchhip naupang, Malsawmhlua (Mama) chu India ram pum huapa badminton inelnaah doubles-ah a kawppui nen bronze medal an la.

Ralte Villa Badminton Club player Mama hi kar kal ta Zirtawpni atanga Pedem, Goa-a khelh, Yonex Sunrise All India Sub-Junior Badminton Tournament-ah a tanpui, Mahendra Kalahasti, Andra Pradesh nen under-17 boy's doubles-ah bronze medal an dawng a ni.

P & E Veng, Serchhipa mi, tuna Kotak Pullela Gopichand Badminton Academy, Hyderabad-a awm mek, Mama leh Kalahasti te hi under-17 huanga an vawi khat telna a nih avangin qualifying atanga bul an tan a ngai a. Qualifying round-ah hian mi pathum an hneh hnuin main draw an thleng thei chauh a ni.

Main draw-a an inlan hmasak berah champion tura rinkai, seeded no. 3 hmachhawn nghal mah se harsatna awm lovin straight set-in an chak a. Inkawp dang pahnih hneh lehin semi final an inhlang kai a. Semi final-ah hian champion tura rinkai ber, Bjorn Jaison leh Aathish Sreenivas P.V te tangdun chu 21-13, 21-17-in an hneh ta lo a ni.

Semi final-a an hneh lohte hi tum dangah chuan an hneh tawh thin a, tun tumah pawh hian hneh leh ngei inbeisei viau mah se he huanga tawnhriat an la neih loh a la hriat deuh a tih theih.

Mama leh Kalahasti te hi nikum khan Yonex Sunrise 2nd Ashwini Gupta Memorial All India Sub-junior Ranking Badminton Tournament-ah inkawl tawhin Under-15 Boy’s Doubles huangah inlanin an lo champion tawh bawk.

Tun tum hi Serchhip rawlthar hian national ranking tournament-a medal pali a lakna a ni ta a. A hmain gold pakhat leh silver pahnih a lo vaw chhuak tawh a ni.

Mizoram Badminton Association (MBA) chuan Mizoram tihmingthatu hi a chhuang a, a hma lam hun atan duhsakna a hlan tih an sawi.