Aizawl March 31, 2023 : Congress President Lalsawta leh Congress hruaitu thenkhat te chuan vawiin khan Press mite kawmna hun an hmang a, court-in Rahul Gandhi kum hnih jail tang tura a chungthu an rel chu thutlukna dik tawk lo an ti a, democracy palzutna lian tak niin an sawi. Vawiin hian India ram state tinah Rahul Gandhi chungchanga court thutluknaah hian Congress chuan Press mi te nen inkawmhona hi an huaihawt.

Rahul Gandhi hi Kolar, Karnataka-a vantlang inkhawma a thusawi avangin defamation case siamsak a ni a, he case hi Gujarat a Surat-ah ngaihtuah a ni thung. A thusawi avang hian thiamloh changin kum 2 lungin tang turin a chungthu rel a ni a, Wayanad constituency, ‎Kerala MP hi a nihna atangin Parliament Secretariat chuan a ban a, a official bungalow atangin an chhuahtir zui bawk. Rahul hi Court chuan ni sawmthum court sang zawka kalna hun a pe a, tun thleng hian court sang zawkah a la zualko rih lo.

Hemi chungchangah hian MPCC President Lalsawta chuan Rahul Gandhi an hrem chhan hi a mimal beihna hrim hrim a ni lo a ti a, Democracy tana thil pawi tak a ni tiin, Rahul Gandhi te ang pawh an thusawi avanga hetiang dinhmuna an ding anih chuan mimir tan chuan BJP huatthu sawi hi thil hlauhawm tak a ni tan tawh a, constitution in mitin tana zalenna a pek 'freedom of speech' a neih chu tuna court thutlukna hian a palzut, a ti.

Lalsawta chuan Surat court thutlukna hian India ram Democracy dinhmun a ti derthawng a ti a, Narendra Modi kaihhruai sawrkar chu dictator angin a che mek nia an hmuh thu a sawi a, tuma sawisel ngam lohin an khawsa mek tiin, anmahni na taka sawisel ngam Rahul Gandhi chu dah that an tum nia a hriat thu a sawi bawk.

MPCC Vice President Lal Thanzara chuan tuna Rahul Gandhi MP atanga an ban chu MNF MLA ten ZPM Leader Lalduhoma MLA a nihna atanga an bantir nen tehkhinin, Rahul Gandhi pawh hi a rawn kir leh hunah chuan ropui taka a rawn kir leh ngei a rin thu a sawi.

MPYCC President Dr. Lalmalsawma Nghaka chuan Rahul Gandhi thiamloh chantirtu Surat Court Judge chu Congress President hlui chunga thutlukna a siam hnu kar khat hnu velah kaisan tir a ni, a ti a. MPCC Legal Cell Vice Chairman Hriata Chhangte pawhin court hian Rahul Gandhi lakah hian a hrem nat thei ang berin a hrem nia sawiin, politics hmanga phuba lakna ni ngeia a ngaih thu a sawi ve bawk.