Aizawl March 28, 2023 : Mizoram Aero-Sports Association chuan National Aero-Sports Policy Vision 2030 tihhlawhtlinna turin Paragliding Training a buatsaih dawn. March 30 atangin Champhai-ah bul tan a ni ang, April 17 thleng training hi kalpui tum a ni a, India rama Paragliding coach tha ten training hi an rawn neih pui ang.

Champhai-ah hian Pilot Proficiency I leh II training te kalpui a ni ang a, Pilot Proficiency III  hi Serchhip-ah neih a ni ang. Tun tumah hian state 12 atangin paraglider 45 ten training hi an nei dawn a, heng zingah hian Mizoram atangin mi 10 an tel dawn a ni.

He training hi International Paragliding Syllabus zulzuia kalpui a ni dawn a. Skill India in a pawmpui niin Certificate pawh Skill India hnuai atanga pek chhuah tur a ni. He training hi Mizoram mai ni lo, India ram pumpui huapa training mumal taka huaihawt hmasak ber tur a ni.

Training a tel, course zir chhuak te chu International Paragliding Licence pek an ni dawn a, khawvel khawi hmunah pawh thlawkin paragliding competition ah te pawh an tel thei tawh dawn a ni. Certificate hi eizawn nan pawh  tangkai tur a ni.

National Aero-Sports Policy Vision 2030 policy ang chuan India mi nuai 10 chuangin paragliding hi an hlawkpui hman tura tih a ni a, hemi atang hian India chuan Aero-sport leh a kaihnawih avangin cheng vaibelchhe 1,600 a lalut hman tura beisei a ni.

MASA hian 2011 khan International Paragliding Festival a lo thleng tawh a, heimi tum hian India ram mi bakah Nepal leh Sweeden atangin mi 47 an rawn thlawk a, 2018 ah Pre-World Cup Serchhip hmuna Mizoram Aero-Sports Association Takeoff hmun ah an thleng a, ram hrang hrang 9 atangin mi 75 an in inelna an hmachhawn a, 2020 khan International Paragliding Accuracy Championship, FAI Category-1 an thleng leh a. Serchhip MASA hmun ah ram 7 atangin mi 21 in an in el leh a ni. Hemi tum hian mi 120 chuang ram 30 atangin in register a ni a. Amaherawh chu, Covid boruak lo in tan chhoh tak avangin participants beisei ang an nei thei ta lo a ni.