Mizo zinga All India Sub-Junior Ranking Badminton Tournament-a Boys Singles category-ah vawi hnih champion thei awmchhun, H. Lalthazuala chu a inzirna hmun atangin chawlh hmang turin Mizoramah a haw a, Lengpui Airport-ah lo hmuah a ni.

Chanmari West, Aizawl rawlthar hi Pullela Gopichand Badmintion Academy (PGBA), Hyderabad-a training-a awm mek niin Inrinni khan Mizoramah a haw a ni. 

Lengpuiah hian Thazuala hi Regional Development Centre, Aizawl leh Tata Trust Grassroot Centre-a training mekten an hmuak a, an chenna in thleng an thlah haw. 

Kum 15 mi chauh la ni, Thazuala hi kumina All India Sub-junior Under-15 & Under-17 Ranking Badminton Tournament, February-a Jaipur, Rajasthan-a khelhah leh June thla tawpa Lucknow, Uttar Pradesh-a Yonex Sunrise All India Sub Junior Under 15 &17 Ranking Badminton Tournament-ah Under-17 Boy’s Singles category-ah a champion a. Mizo zinga All India Sub-Junior Ranking Badminton Tournament-a Boys Singles category-ah vawi hnih champion thei awmchhun a ni.

Mizorama a châm chhungin Thawhtanni atanga khelh tan tur, Mizoram Badminton Association Official Badminton Championship Tournament - Senior 2023 a khel nghal dawn a, mipa maltanah a inlan dawn a ni.