Thla khat pawh tling lo chhunga India ram tana nomawi pahnih pet chhuaktu, Lallianzuala Chhangte chuan mi mal chawimawina ropui pahnih nen a pianna ram leilung a rap ta a. Mizo mipuite chungah a lawm tak zet tih a sawi.

2022-23 Season AIFF Senior Player of the Year (Men) atana thlan, Lza Chhangte hian India ram tana Hero Intercontinental Cup leh SAFF Champuinship nomawi a lak hnuah Nilaini khan Mizoram a thleng ta a, Lengpui Airport-ah Mizoram Football Association (MFA)-in lawmpuina leh chawimawina thilpek a hlan. 

India rama mihring maktaduai tam tak zinga kum 2022-23 chhunga ball pet thiam ber thlan, Lunglei tlangval chuan, “MFA-in AIFF Player of the Year leh SAFF Cup champion lawmpuina thilpek min hlan hi thinlung takin ka lawm,” a ti phawt a. “Mizoram mipuiin min thlawpin min tawngtaisak thin avangin an chungah lawmthu ka sawi a, hmabak tam tak a la awm a, min lo tawngtaipui zel turin ka ngen nghal che u,” a ti.

Lza hian amah siam liantu, Lunglei district-a football thuneitute pawh a theihnghilh lo va, “A tir atanga bul min tanpuia tun thlenga theihtawp chhuaha min thlawpa min fuih rengtu, Lunglei District Football Association (LDFA) chungah ka lawm em em bawk a ni,” tiin amah lo hmuaktute hnenah a sawi a ni.

Mizo mai ni lo, India ram player chhuanvawr hi Mizoram Premier League Season 3 play off-a Lunglei FC tana rawlthar mai a nih laia a inlan atanga Mizoram football khawvela hriat tan a ni a. Season hman zawh chiahah a che tha a, a chet dan enin India rama player tha bera thlan hi a phu hle.

Mumbai City leh ram tan inelna hrang hrang vawi 46 a inlan a, goal 21 thunin a thiante thun tur vawi 10 a siamsak bawk.

Team tan Hero Indian Super League (ISL) Shield a pet chhuak a. India ram tan Hero Intercontinental Cup hlawh chhuakin final-a Lebanon an hneh tumin Player of the Match atan thlan a ni a. Thawhlehni zan maiah khan SAFF Championship final-ah penalty petah Kuwait hnehin hun pangngaia 1-1 a an inhnehtawkna goal a thun bawk.

Hero ISL-ah hian player tha ber nihna hauhvin Golden Ball a dawng a, Durand Cup-ah pawh hetiang tho hi a dawng a. Tun hnaiah Footballer Players Association of India (FPAI) Indian Player of the Year atan thlan a ni zui a, a aia hlu, AIFF Player of the Year atan thlan a ni leh ta bawk a ni.

Mizo tlangval hi Mizoram pana a lo haw dawn pawhin Kolkata thlawhna tumhmunah thlawhna khalhtu kaihhruainain chawimawina leh lawmpuina hun hman a ni bawk a. AIFF Player of the Year a nih thu leh SAFF-a India champion-puitu a nih thu uar takin flight attendant-in a puang a, thlawhnaa chuangten uar takin lawmpuina kut an bensak a ni.