ZALEN June 30, 2026 : Congress party chuan vawiin khan Congress Bhavana Golden Hall-ah 'Remna Ni' an hmang a, he huna thusawitu an President Lal Thanzara chuan remna leh muanna a awm theihna atana hmalak a nih lai khan India ramah Congress sawrkar lo se hetiang hun hi hman a nih a rinawmloh a ti.

MPCC President Lal Thanzara, President chuan Pathian hnenah remna champha kum 40 na min hruai thlen avangin lawmthu a sawi a ni. Remna leh muanna neih nana hmalak a nih mek lai khan India ramah Congress sawrkar lo se hetiang ang hun hi hman a nih rinawmloh a ti.

Morarji Desaia te, opposition hotute kha chuan Mizoram mipuite chu uihum lek an ni a, mankhawm vek ila hmun hrang hrangah dah darh vek ila an ti a. Mahse, Indira Gandhi, Buta Singh leh INC hruaitu te avang khan inbiakna neih theih a ni zawk niin a sawi.

Lal Thanzara chuan khatihlai khan Mizoram-ah Pu Hawla kaihhruai sawrkar lo se chuan remna leh muanna a thlen a beiseiawm loh niin a sawi a. Mizo mipui tawngtaina, kohhran hruaitute hmalakna, pawl hrang hrang leh zirlai te leh party te hmalakna avangin remna leh muanna nei a ni, a ti.

Thusawitu dang MPCC Secretary DR Zirliana, zalenna suala lo rammu tawh chuan India ram chanchin sawi dawn chuan Congress tel lovin a sawi theih loh va. India ramin Sapho awpna atanga zalenna a hmuh dan sawi dawn chuan Congress tel lovin a sawi theih loh a. Chutiang chiah chuan Mizorama remna leh muanna chungchang sawi dawn chuan Mizoram Congress leh a hruaitute tel lo chuan sawi theih a ni lo, a ti a. 

Political party dang te, kohhran te, Zirlai pawlte leh YMA lamte pawhin remna leh muanna atan an bei ang a, mahse, an bei a ni mai a, remna atana inbiak nan te hmasawnna tak tak leh a lo thlen tak dante sawi dawn chuan Congress leh hruaitute hming lam lo chuan a sawi theih loh niin a sawi bawk.