ZALEN May 6, 2026: Mizoram State Legislative Assembly Speaker Lalbiakzama chuan vawiin khan Kulikawn-ah natna hrik zawn chhuah leh enfiahna Agilus Diagnostic Ltd. a hawng a, “Mizoram tana rahbi thar kan kaina ni a ni” a ti.

Lalbiakzama chuan Ram leh hnam hmasawn tur chuan a chhunga chengte hriselna dinhmun a tha tur a ni a, “Kan hriselna dinhmun kan hriat a, enkawlna tha kan dawn thuai hi sum tam tak senralna laka min vengtu a ni,” a ti. Agilus Diagnostics Ltd chuan Aizawl-ah Branch leh sample collection point hawn belh zel a tum bakah District hrang hrangah hetiang hawn belh zel tum a ni chu a lawmawm hle a ni, a ti bawk.

Agilus Diagnostics Ltd. hi SRL Diagnostics tih a ni thin a. India rama diagnostic network lian leh rintlak ber zinga mi niin kum 1995 khan din a ni a. Kum 29 zet ram mipuite hriselna endik leh damdawi lam hna (diagnostic excellence) an lo thawk tawh a ni. Kum 2024 khan 'Best Diagnostics Chain of The Year' leh kum 2023-ah 'National Diagnostics Chain of The Year' chawimawina lo dawng hial tawh an ni a.

Agilus Diagnostic Ltd. hi mipui tana awlsam leh man tlawm zawk leh rintlak zawk tura ruahman a ni a. Mamawhtute tan awlsam zawka anmahni dawr theih nan Agilus app leh website-ah a book theih a, Test result-te awlsam takin a en theih a, mobile-ah thawn nghal zel thin a ni bawk.

Agilus Diagnostics Ltd. hian natna hrik zawn chhuah leh enfiahna (Accurate Diagnosis) test chi hrang hrang 3,600 chuang an nei a, chung zingah chuan Pathology (thisen, zun, etc.), Radiology (X-ray, Ultrasound), leh Molecular Diagnostics (genetics leh cancer enfiahna) te a tel a, an laboratory tam tak hi NABL leh CAP accredited an ni.