Aizawl April 10, 2024 : Lok Sabha, MP inthlan lo awm tura INC Candidate Lalbiakzama chuan vawiin khan Khawlailung leh Serchhip-ah Street Campaign a neih chhunzawm zel a. Lalbiakzama chuan BJP sawrkar hnuaiah India ramah Chanchinbu mite zahawmna leh zalenna a tla hniam chak hle a. Hei hian India ram Democracy chu a tla hniam chak hle a ni tih a lan tir a ni, a ti.

INC Candiate Lalbiakzama chuan, BJP Sawrkar hnuaiah India ram chu a chhe chak tawh hle nia sawiin Press Freedom Index, khawvel ram hrang hrang 180 chuang zinga chanchinbu mite, Journalist-te zalenna tehnaah India ram chu 161-na kan ni mek a. Chanchinbu mite zahawmna leh an zalenna hi a tla hniam chak hle a. Hei hian India ram Democracy chu a tla hniam chak hle a ni tih a lan tir a. Khawvela eirukna lian ber Electoral Scam-ah Central BJP sawrkar chu a hmingchhe hle a ni, a ti bawk.

Lalbiakzama chuan, BJP hi Parliament inthlan-ah an sawrkar nawn leh a nih chuan, India hi democracy a ni reng a ngem tih hi hriat a ni tawh lova. He thil avang hian India rama mithiamte leh mi thil chik mite an rilru a hah hle a ni tih sawiin Jammu & Kahmir State, Muslim chen tamna a nih avanga an inhumhimna an han nuai bo sak dan te, Manipur-a kan Kristian Biak In an suasam dan leh an hal chhiat dan en hian BJP an sawrkar nawn leh a nih chuan India mithiam leh thil chik mite rin dan ang ngeiin BJP te hian Democracy hi an nuai bo ngei a rinawm a. Chutih hunah chuan Mizo Kristiante hi kan him a rinawm bik loh a ni, a ti.

Mizoram Sawrkar-a hun rei tak Home Secretary hna lo chelh tawh Lalbiakzama chuan, tunah hian a Candidate pui, ZPM leh MNF Candidate te hi a mihring tak pawhin an sual ka ring lo, mi tha tak an ni ang tih pawh ka ring. Nimahsela, BJP thawhpuia, BJP lama ban phar tur an nih miau avangin Mizo mipuite’n kan vote thlakna tur chu uluk taka ngaihtuah a, eng party candidate nge vote ila, kan ram, kan hnam, kan sakhua a him theih ang, tih rilru pu chunga vote thlak turin Zoram mipuite a chah a. BJP ten kan ram leh sakhua an sawp chhiat vek hma a, tangrual a, BJP Sawrkarna thlak ngei tura theihtawp chhuah a hmalakpui tur leh Kristian tana MP Candidate-a ding a ni, tih hriat saka amah vote turin Zoram mipuite a sawm bawk a ni.