ZALEN March 7, 2026: Eirawngbawlna gas chu vawiin atang khan India ram pumah tihsan a ni a, Kg 14.2 a rit LPG cylinder hi state ten an hman rate atangin Rs. 60-ah, Kg 19-a rit cylider man chu Rs. 115-a tihsan anih thu Times of India chuan a tarlang. 

Food Civil Supply & Consumers Affairs Department, Secretary Teresy Vanlalhruaii chuan hemi chungchangah hian Mizoram chuan ziak chuan hriattirna an la dawn lo thu ZALEN a hrilh a, thu chuan an hre tawh tih a sawi.

Delhi-ah chuan Kg 14.2 a rit LPG Cylinder hi Cheng 853 atangin cheng 913-ah a chho dawn a, Mumbai-ah chuan Rs. 825.50 atangin Rs. 912-ah a chho ang. Mizoram-ah chuan Vairengte-ah Rs. 996 niin Rs. 1,056 a nih tawh dawn a, Mizoram hmun dangah chuan Rs. 1,005 ni thin kha Rs. 1,065 a ni dawn tihna a ni. Home delivery charge leh point delivery charge chu a ngai tura ngaih a ni.

Delhi-ah chuan Commercial gas cylinder hi Rs 1,768.50 atangin Rs 1,883-ah a chho a, Kolkata-ah chuan Rs 1,875.50 atangin Rs 1,990-ah, Chennai -ah pawh Rs 1,929 atangin Rs 2,043.50-ah a chho ang.

Mizoram-ah chuan Vairengte tiam lovin Kg 19-a rit gas cylinder hi Rs. 2188 atangin 2303-ah a chho dawn a, 19 KG Xtra TeJ pawh Rs 2210.50 atangin Rs. 2325.50-ah a chho ang.