Aizawl October 1, 2024 : October 1, 2024 (Thawhlehni) hi khawvel puma kum upate ni (International Day of Older Persons) a ni a, hemi pual hian NHM hnuaia National Programme for Health Care of the Elderly (NPHCE) bultumin Central YMA Conference Hall Tuikhuahtlang-ah hun hman a ni. 'Upat leh Hriselna' tih thupui hmanga hun hmangtu Dr. Catherine Lalmuanawmi chuan India rama kum upa an pung chho tial tial tih a sawi.

Dr. Catherine Lalmuanawmi, State Nodal Officer, NPHCE chuan Presentation a pek naah, “India ramah hian kum upate hi kan pung chho tial tial a. Zir chianna in a tarlan danin Kum 2013 khan India ramah kum upa maktaduai 100 vel awmin kum 2021 khan maktaduai138 vel an awm tawh a. Kum 2050-ah chuan maktaduai 347 chuang tura ngaih a ni. Chuvangin WHO pawhin kum 2021 atanga kum 2030 inkar hi Decade with Healthy Living atan a lo puang hial a ni,” a ti.

Dr. Catherine chuan, “Mizoramah hian mi nawlpui dam rei zawng (life expectancy) pawh tunah chuan a lo kang chho ve hret hret zel a. Tunah hian Mizo mipa dam rei zawng hi kum 68.3 niin hmeichhia hi kum 73 bawr ni a chhut a ni. Mizoramah hian mipui za zela 8 hi kum upa, kum 60 chin chung lam an ni a. Kum 80 chung lam pawh kan pung ve zel bawk a. Hei hi thil ropui tak pakhat a ni. Kum upate hlutna hi kan hriat chian leh zual a hun ta hle."

"WHO pawhin kum upate tana insenso hi thil manhla tak a ni tih hria in hma a la nasa hle a. India sawrkar pawhin Nationah Health Mission hnuaiah kum upate enkawlna tur pawimawh tak Programme National Programme for Elderly tih chu a duang chhuak ta hial a. He Programme hnuaiah hian Mizoram pawhin upa ten hriselna tha zawk an neih theihna turin kawng hrang hrangin hma a la mek a ni," a ti.

Upate tan hian damdawiin tinah khum 10 reserve a nih dan te, district pali-ah kum upate pual liau liauva MMU leh Physiotherapy kalpui a nih dante bakah upa ten taksa mai bakah rilru hrisel an neih theih dan tur a zirtirna a pe bawk a ni.