Federation of Automobile Dealers Associations (FADA)-in a tar lan danin March 2023 chhungin India ramah lirthei chi hrang hrang 20,41,847 hralh chhuah a ni a, kum hmasa aiin 13.89%-in a pung.

Mizoramah thla liam ta chhungin 2,251 hralh chhuah a ni ve thung a, March 2022-ah 2,553 niin -11.83%-in a tlahniam. Mahse, February 2023-ah 2,243 a ni a, thla hmasaah pariatin hralh chhuah a tam zawk.

FADA Mizoram Chapter Chairperson Dr Franklin Lalrinngheta chuan : "Kan state pawisa dinhmun a tha lem lo a nih hmel. India ram pumah a pun hle laiin Mizoramah chuan kum kal ta nen khaikhinin personal vehicle tih loh a tlahniam vek a, 3-wheeler phei chu nasa tak a ni," a ti.

Thla hmasa chhungin Mizoramah 2-wheeler 1,613, 3-wheeler 12 leh sumdawn nana hman chi commercial vehicle 194 hralh chhuah a ni a, nikum March-ah 2-wheeler 1,847, 3-wheeler 42, commercial vehicle 252 hralh a ni ve thung.

Personal vehicle hralh zat 432 niin kum kal ta aiin 20-in a pung a; mahse, a pum puiah nikum March aiin 302-in hralh a tlem a, 11.83%-in a tlahniam.

India ramah nikum March chhungin 17,92,802 hralh a ni a, thla hmasa nen khaikhinin hralh zat 2,49,045-in a pung a. February 2023-ah 17,75,424 hralh a ni a, thla hmasaah hralh chhuah a pung nasa hle a ni.