ZALEN, June 17: Zirchianna hrang hrang atanga a lan danin India ramah mipa aiin hmeichhe zu in an tam zawk tih tarlan a ni. India ramah hian zu in thin mi vaibelchhe 16 vel zet an awm a, chung zinga a tam zawk chu hmeichhia an ni mauh mai! 

Ministry of Health and Family Welfare, Government of India chuan National Family and Health Survey (NFHS) a kalpui thin a, state hrang hranga mipuite hriselna dinhmun bakah, thil chi hrang hrang an zirchiang thin. NFHS-5 (2019-2021) data atanga a lan dan chuan Arunachal Pradesh chu India ram state zinga hmeichhe zu in tamna ber a ni a, Sikkim chu pahnihna an ni. 

Hmarchhak langsar

India rama hmeichhe zu in tamna state zingah hmarchhak state te an langsar hle. Arunchal Pradesh-ah hmeichhe zu in 24.2% an awm a, state dangte nen khaikhin pawhin an sang fal hle. Arunchal Pradesh hnaih bertu hi Sikkim (16.2%) an ni a, pathumna pawh Assam (7.3%) an ni - hmarchhak state ten top 3 an hauh tihna a nih chu. 

Telangana chu palinaah an awm a, a hnuaiah hian - Jharkhand, Andaman and Nicobar Islands leh Chhattisgarh te an awm bawk. Telangana-ah hian hmeichhe zu in 6.7% lai an awm a, Jharkhand-ah pawh 6.1% an tling. Khualzin tlawh tam state Andaman and Nicobar Islands-ah pawh 5% awmin, state ral muang lo Chhattisgarh-ah 4.9% an awm bawk. 

Hmeichhe zu in tamna state te chu : 

1. Arunachal Pradesh - 24.2%

2. Sikkim - 16.2%

3. Assam - 7.3%

4. Telangana - 6.7%

5. Jharkhand - 6.1%

6. Andaman and Nicobar Islands - 5%

7. Chhattisgarh - 4.9%