ZALEN, Nov. 25, 2024: Odisha-a Yonex-Sunrise 47th Inter State – Inter Zonal & Junior National Badminton Championships 2024-ah Serchhip tleirawl, Lalrempuii chu a kawppui nen junior huangah an champion.

Thawhlehni atanga MPIS Niladri Vihar, Bhubaneswar-a inelna khelh tanah hian Rempuii hi Tanoo Chandra nen inkawpin girl's doubles-ah an champion a ni.

Rempuii te thian dun hian final-ah Seeded No. 3 Durga Isha Kandrapu leh Taarini Suri te tangdun chu 23-21, 21-15 in an hneh a ni.

Rempuii hi Mizo hmeichhe zingah national sub-junior, junior leh senior tournament-a semifinal leh final lut thei hmasa ber a ni a, champion thei hmasa ber a ni ta bawk a ni.

September thlaa Panchkula, Haryana-a 31st Smt Krishna Khaitan All India Junior U-19 Ranking Badminton Tournament-ah khan Rempuii leh Chandra te thian dun hian qualifying round atanga khel tanin bronze medal an lo la dun tawh.

A hma lawka North East Zone Inter-state Badminton Championship-ah pawh Rempuii hi Girls’ Team Championship-ah Mizoram chu pahnihna nihpuiin thawhhlawk ber zinga mi a ni bawk.