ZALEN May 25, 2026: Special Intensive Revision (SIR) 2026 tluang taka kalpui a nih theih nan ni thum chhung Booth Level Officers (BLO), Assistant/Additional Booth Level Officers (ABLO) leh BLO Supervisor te tana training buatsaih a ni.

May ni 25, 26 leh 28 chhung hian Aizawl khawpui chhungah I&PR Auditorium, Pisapui Hall, School Education Conference Hall leh BDO Conference Hall, Darlawn-ahte training neih a ni ang a. Training-ah hian Aizawl District chhunga Assembly Constituency hrang hrangte an tel dawn a ni.

May 25 chawhmaah Aizawl North-I, Aizawl East-I leh Aizawl West-I Assembly Constituency aiawhte an training a, chawhnu session-ah Aizawl North-II, Aizawl East-II leh Aizawl West-II Constituency aiawhten training an nei thung a ni.

May 26 chawhmaah Aizawl South-I leh Aizawl West-III Constituency aiawhten training an nei ang a, chawhnu session-ah Aizawl South-II leh Aizawl South-III Constituency aiawhte training an nei leh ang. Tuivawl (ST) Assembly Constituency atan pawh BDO Conference Hall, Darlawn-ah training a hranpaa neih a ni bawk ang.

May 28-ah hian Aizawl North-III (ST) Assembly Constituency huam chhung BLO te tan Pisapui Hall, DC Office, Aizawl-ah training session hnuhnung neih a ni ang.

Training hi District Level Master Trainers (DLMT) — Dr. Lalchamliani, BDO Tlangnuam; Lalruatpuii Hnamte, DCSO Aizawl East; Christina Lalmuanzuali, Under Secretary, Finance Department leh Hmingmawizuala, Assistant Commissioner ten an kaihruai ang.

Special Intensive Revision (SIR) 2026-ah hian BLO te chu electoral roll thar dik leh felfai buatsaih kawngah mawhphurhna sang tak an nei dawn a. May ni 30 atanga fehchhuak tanin, BLO te hian Enumeration Form sem, voter-te hnen atanga form lakkhawm, in tin tlawh chhuah leh voter te detail tihdik hna an thawk ang a. Electoral roll tharah vote nei thei zawng zawng, hmaih nei loa an tel vek theih nan mawhphurhna sang tak an nei dawn a ni.