Mizoram Basketball Association (MBBA) chuan India Under 18 team coach lo ni tawh leh India aiawh pawha lo khel tawh, H.Laldinsanga hovin Coaching Certification Course 2023 an buatsaih mek a, tun kar chhung a awh ang.

Hawla Indoor Stadium, Republic Vengthlanga coaching course kalpui mek hi Thawhtanni atanga tan kha niin Inrinni hian zawh tura ruahman a ni.

Coaching course-ah hian Mapuia tia hriat lar, H.Laldinsanga chu programe instructor atan hman niin tunah hian International Basketball Federation (FIBA) Level 3 coach a ni mek.

Mapuia hi kum 2018 khan Basketball Federation of India (BFI) chuan Under 18 Indian team kaihruai turin a lo ruat tawh a. A khelh ve lai pawhin kum 2004 khan India Junior team vice captain hial ni phakin senior national team tan pawh a lo khel tawh bawk.

Mizorama basketball league sang ber, MBBA buatsaih Mizoram Super League (MSL)-ah pawh a season hmasa ber, kum 2015 khan Most Valuable Player (MVP) atan thlan a ni a. MSL season hmasa pahnihah hian player cum coach niin Khatla TBL chu a champion-pui ve ve nghe nghe.

MBBA Coaching Certification Course 2023 a buatsaihah hian Mapuia bakah hian Sports Authority of India (SAI) hnuaia mi, Asia khawmualpuia sports institute lian ber, Netaji Subhas National Institute of Sports, National Institute of Sports (NIS) tia hriat lar atanga inzir chhuak pahnih, Samuel Lalthlamuana leh KC Lalliantluanga te chu zirtirna kalpui tura ruat an ni bawk.

Programe-ah hian hmeichhiapathum trainee mi 34 thlan an ni a. Aizawl district pawn atangin Champhai, Lunglei, Mamit leh Kolasib district atangin mi pariat an tel thei bawk.