India-a sports ministry chuan inthlang zo chiah, Wrestling Federation of India (WFI) chu a hrem zui leh ta a, khawvel huapa India vawi tam lo timawi tawhtute khaikhawmtu pawl buaina hian a awh reiin a ril ta hle.

President tharin dan bawhchhia?

WFI hi Ningani kal ta maiah khan Delhi-ah an inthlang a, hetah hian president kal chhuak ta, wrestler tam takin an duh loh, Brij Bhushan Sharan Singh-a thuihhruai zinga mi, Sanjay Singh chu a thlaktu atan thlan a ni.

Ni thum chauh a liam hman tihah president thar hi Pathianni (Krismas urlawk ni) khan sports ministry hian an pawl dan ngei bawhchhia nia puhin a kaihhruai pawl chu a titawp lailawk (suspend) leh nghal tih hriattirna a chhuah zui nghal a ni.

Ministry hian a lo enkawl lailawktu tur ad-hoc body din turin Indian Olympic Association (IOA) a ti nghal bawk.

Sanjay Singh-a hian president a nih rual deuhthawin U-15 leh U-20 national championship chu Nandini Nagar, Gonda, Uttar Pradesh-ah kuminah ngei neih turin a ti nghal a. Hei tak hi sports ministry chuan dan kalh a nih thu leh tournament buatsaih dawnin player-te an inbuatsaih nan ni 15 tal a karah a tla tur a ni tih a bawhchhia niin a puh.

“WFI dan an zawm lo. Federation hi kan titawp lo va, thu leh awm hma erawh suspend an ni a. Thil kalhmang leh dan an zawm a ngai a ni,” tiin sports ministry hotu chuan PTI a hrilh.

“Sanjay Kumar Singh-a hian president atana thlan a nih niah kumina intihsiakna awm tur a puang nghal a. He thu puan hi a dik lo va, a tel tur wrestler-te hriattirna lawk a awm lo va, WFI danpui kalh a ni,” a ti.

WFI danah chuan Senior, Junior leh Sub Junior National Championship buatsaih tur hian UWW Rules angin Executive Committee inrawnin tih tur a ni tih ministry chuan a sawi.

Wrestler-te duh loh Sanjay Singh

WFI president atana hneh taka thlan tlin, Sanjay Singh-a hi a thlak tak duh lotu Indian wrestler lawk tak takte bawkin an pawl hruaitu atan an duh lo.

Brij Bhushan Singh-a kha an laka mawi lo taka chea an puh avangin wrestler hmeichhe tam takin an duh lo va, a aiawhtu tura a thuihhruai bawk thlan leh a ni hi an duh lo pawh a mak lem lo.

WFI chief a nih laia Brij Bhushan Singh-a duh lotu langsar, Sakshi Malik chuan WFI tihtawp lailawk a ni chu lawmawm a tih thu a sawi nghal.

“Sorkar hian eng nge kan beih mek hi a hriat thiam chhoh zel ka beisei,” a ti a. “Hmeichhe president an awm theih chuan hmeichhe women wrestler-te himna atan a tha lehzual dawn a. Kan ram farnu leh fanute tan kan bei a ni,” a ti.

Rio Olympic bronze medallist Malik-i hian Sanjay Singh-a a tlin chiah khan wrestling a chawlhsan thu a puang nghal bawk a. “President atan hmeichhia kan duh a, a ni dawn ta si lo,” tiin mittui tla chungin a sawi.

Sanjay Singh-a thlan a nih a duh lohzia lantir nan Bajrang Punia-i pawhin a tukah khan a Padma Shri medal chu sorkar hnenah a kir a, Tokyo Olympic Games-a bronze medal latu hian sorkarin thuthar a neih hnuah pawh lak let a tum chuang lo.

Deaflympics gold medallist, Goonga Pehlwan tia hriat lar, Virender Singh Yadav pawhin wrestler dangten Sanjay Singh-a an duh lohna a thlawp tih lantir nan a Padma Shri dawn chu sorkar hnenah a kir dawn tih Inrinni khan a puang ve bawk.

Sanjay Singh a tang

A kaihhruai tur infiam mi langsar tak takten an duh loh, Sanjay Singh-a chuan sorkar thu a chhuah hnu lawkah WFI chu dan pangngaia kalpui zui a nih theih nan sorkar hnenah insawi fiaha an buaina chin fel thuai a nih tur thu a sawi nghal a, dan hmanga beihna pawh a ni thei.

“Sports minister hnenah hun kan dil a, suspend pawh hlip turin kan ngen a. Inbiakna hmanga kan ching fel thei lo a nih pawhin dan hmanga tih dan a awm,” tiin PTI hnenah a sawi.

“Thutlukna kan siamnaah dan kan zawm tih finfiahna kan nei a, kan la phawrh ang. Thutlukna siam reng reng inrawn tlanga tih vek a ni a, ka mi mal thutlukna a ni lo. State 24 association hnenah affidavit pek an ni a, email pawh kan dawng vek a, ziakin engkim kan nei,” tiin dan a bawhchhiat loh thu chu a tang nasa hle.