BBC Indian Sportswoman of the Year chu March ni 28 hian puan chhuah a ni dawn a, 'Indian Sportswoman of the Year' dawng thei tura thlan chhuah te hi BBC Sport website emaw BBC Indian Language website te atangin February ni 28 thleng a vote theih a ni ang. 

He award dawng thei tur hian Indian nula infiamna lama chungchuang bik mi panga thlan chhuah niin chung mite chu golfer Aditi Ashok, boxer Lovlina Borgohain, weightlifter Mirabai Chanu, Para-shooter Avani Lekhara leh badminton player PV Sindhu te an ni.

He award-ah  hian ni 1 October 2020 atanga 30 September 2021 chhunga an result an en dawn a, hemi hun chhunga Indian hmeichhe sport lama chetha ber chawimawina dawng thei tura chhawp chhuah te hian ram pum hriat hlawh khawpa ropui hlawhtlinna an dawng vek hlawm a, an zing atanga a tha ber thlan chhuah pawh hi a harsa hlein a rinawm. 
        He award sem rual hian Emerging Sportswoman of the Year leh Lifetime Achievement award sem tel nghal a ni ang. BBC Indian sportswomen atan a thlan chhuah theih tura mi 5 chhawp chhuaktu jury te chu sports journalist thlan bik te, expert leh India rama ziaktu lar ber ber te an ni a, an rintlak hlein a rinawm. 

Nominee te chanchin tlangpui :
Aditi Ashok (golf)

Aditi Ashok hi golf khel thin niin Indian hmeichhe infiammi zinga hma hun eng ber pakhat a ni. Kum 18 mi chauh a nihin Ashok-i hi India aiawhin 2016 Rio Olympic-ah telin Indian team zinga naupang ber pawl a ni. Kum 23 a nihin Tokyo Olympic-ah palina niin medal a dawng phak lo chiah a, a hlawhtlinna avang hian nasa takin India-ah golf a lar phah a ni. 

Kum 2016 khan Indian player zinga a hmasa ber turin Ladies' European Tour-ah pakhatna a ni a, 2021 khan LPGA Tour-ah top-10 tum thum a ni thei bawk. 
Lovlina Borgohain (boxing)

Muhammad Ali hi boxing khel tura phurna leh thathona min siam saktu a ni tia sawi thintu Lovlina Borgohain hian Tokyo Games-ah khan bronze medal a hnek chhuak a, Indian boxer zinga Olympic podium lawn thei pathumna a ni.

Borgohain hian kum 2017 Asian Championships-ah khan bronze medal a hnek chhuak a, 2018 India Open-ah gold medal a awrh thei bawk. Australia a neih Commonwealth Games-ah khan India aiawhin a inlan a, he bakah hian World Championship-ah bronze medal tum hnih a awrh tawh bawk. 

Assam nula kum 24 mi hian kick-boxing atanga bul tanin a laizawn te pahnih hnen atangin boxing khel tura phurna a nei tana tun hi a thleng chho ta a ni.
Mirabai Chanu (weightlifting)

Weightlifter Mirabai Chanu hian nikum 2021 khan sport lama India-in ala tawn ngai loh ramah hruai thlengin Indian weightlifter zinga a hmasa ber ni turin Tokyo Olympic-ah khan silver medal a chawi chhuak. 

Zin kawng hauhtak zawhtu Chanu hian Rio Games 2016 khan rit chawi tura bituk zat chawi zo lovin beidawnna ruamah lutin infiamna lam a chawlhsan hman tep a ni. 

Mahse, beidawng mai lovin a rawn ding chhuak leh a, 2017 khan World Championship-ah gold medal a rawn awrh leh thei a ni. Chanu hi 48kg division-ah a tel thin a ni. 

A ni pawh hi north-east lam chhuak bawk niin thenawm Manipur state a mi a ni a, a chhungte chu thingpui dawr te siama eizawng thin an ni. A zinkawngah Chanu hian sum lamah harsatna a tawk nasa em em thin a ni. 
Avani Lekhara (Para-shooting)

Avani Lekhara-i hi India hmeichhe shooter zinga Paralympic champion hmasa ber niin Paralympic Games-ah gold medal a awrh a ni. Kum 20 mi hian gold a kap chhuak satliah mai lo va, Tokyo-ah khan 10m air rifle Paralympic record a siam thei nghe nghe a ni.

SH1 competition-ah women's 50m rifle ah tel lehin pathumna niin bronze medal a hlawh chhuak leh bawk a ni. A naupang laia car accident a tawh vanga rual ban ta lo Lekhara hi accident atanga a dam fel awrh tihin a pa chuan shooting lama kal turin a ti a, hemi hnu hian a hawi kir leh ta lo a ni. 
PV Sindhu (badminton)
 

Kan nunah hian engkim ka ti thei tih ka chiang tingam khawpa mahni inring tawk shuttler PV Sindhu hi a hming pum chu Pusarla Venkata (PV) Sindhu a ni a, Indian hmeichhe zinga mimal a Olympic medal pahnih dawng thei awmchhun a ni. 

Tokyo Olympic Games-ah khan bronze awrhin Rio-ah khan silver medal a awrh leh bawk. Nikum kum tawp khan Badminton World Federation World Tour Final-ah silver medal a awrh leh thei a ni. 

India rama badminton vawrh lar zualtu pakhat PV Sindhu hian kum 2019 khan Indian hmeichhe zinga a hmasa ber ni turin Basel, Switzerland-ah World Championship title a la thei a ni.