Indian Wells Masters khelh mekah player hriat hlawh leh chak tura rin kai pahnih Stefanos Tsitsipas leh Alexander Zverev te chu an tumpui te hneh zo lovin quarter-final-ah an chak zo lo. Greek mi world number 3 Tsitsipas chu Georgian Nikoloz Basilashvili-a lakah 6-4 2-6 6-4 in a tlawm a, German Olympic champion Zverev pawh match point tum hnih ngawt a hloh hnuah mak tak maiin 4-6 6-3 7-6 (7-3) in American Taylor Fritz-a lakah a tlawm ve bawk.

Basilashvili leh Fritz te pahnih hi semi-final ah an inhmachhawn ang. Heng player pahnih te hi Master 1000 tournament-a semi-final an luh vawi khatna ve ve a ni. French Open pahnihna Tsitsipas, seeded pahnihna hian a khel tha lo hle a, set khatna atangin Basilashvili-a hi a chungnung zawk a ni. Tsitsipas-a pawh hian Masters 1000-ah hi chuan hming ala chher bik lo hle a, April thla khan a tum khat nan Monte Carlo Masters-a a chawi ve chauh a ni. 

Quarter-final pahnihna zawkah set khat ve ve an lak hnuin Zverev hian 5-3 in hma a hruai a, double fault tum hnih a neih chu tuarin Fritz-a hian a lehthal ta a ni. Tie-break an khelh dan enin kum 23 mi hian semi-final luh a phu zawk a ni. Zverev-a tlawm hi mi mak tih a tling a, a chhan chu tun hnai a che tha em em a, match 21 a khelha tum 20 chak record nei lai a nih vangin a tum thum nan Masters 1,000 title hi a lak ringtu an tam hle nghe nghe. 

Semi-final leh lamah hian Britain mi Cameron Norrie leh US Open champion Daniil Medvedev hnehtu Bulgarian mi Grigor Dimitrov te an inhmachhawn thung ang.