Police-te chuan mipui karah mittui tlakna gas an kap a, hei vang hian mipui pungkhawm tam tak chu an thawk a chham a, police lam nen intibuai zuiin mipui inchil buainaah mi 129 an thi tawh niin official-te chuan an sawi. Stadium chhunga chhiatna thleng rapthlak ber zinga mi a ni.

Police lam chuan buaina siamtu te awmna lamah tear-gas eng emaw zat an kap a, inchil buaina hi a thleng zui ta a ni. 
East Java-ah Arema FC leh an hmelma hlun Persebaya Surabaya te nen an inkhelh tumin Arema lam hian an khingpui Persebaya Surabaya an hneh loh hnuah buaina hi a intan a, hun tawp hamrik a rik rualin entu mipui thahnem tak chu mual chhungah an tlan lut a, he buainaah hian mi 180 chuangin hliam an tuar bawk a ni. 

Chief security minister chuan, stadium chhunga leng chin pelin mipui 4000 vel zet stadium chhungah hian an inhnawh lui niin a sawi. 

President Joko Widodo chuan he buaina thleng hi chhui chian a nih hma chuan Indonesia-a top league match zawng zawng pawh khelh chhunzawm a nih lo tur thu a sawi tawh bawk. 

Video lama a lan dan chuan fans-te chu hun tawp whistle a rik rualin khelmual chhungah an tlan lut tih a lang. Buaina a chhuak nghal niawm tak a ni. Mipui pungkhawm tam lutuk leh buaina khap dai tur chuan police-te chuan mipui lamah mittui tlakna (tear gas) an kap a, hei vang hian mipui pungkhawm te chu an chiai nasa hle a, an thinrimin police lam pawh an bei zui ta niin East Java-a police hotu Nico Afinta chuan a sawi.

Afinta chuan,"Police lamin chu buaina chu kan khap dai zo ta lo a, police officer-te an bei ṭan a, car te pawh an tichhia a ni," a ti. Thi zingah hian police officer pahnih an tel tih a sawi bawk.

"Inkhel entu mipui zawng zawng kha buaina siamtu leh thunun theih loh an ni lo va, buaina chawk chhuaktu tak chu mual chhunga tlan lut mi 3,000 vel chauh kha an ni," a ti.

Fans thahnem tak chu buaina pumpelh tumin chhuahna pakhatah tlanchhuah tumin an inhnawh a, an innek buai leh chil buainaah mi tam takin bauruak mamawh khawp an hmu ta lo a, thaw chhamin an awm ta a ni," a ti bawk. 

Social media thenkhat a video hmuh theih thenkhatah chuan fans tam tak chu tlanchhuah tumin bang hungah chuan an lawn a, video dangah pawh mihring nunna nei tawh lo tih hriat thahnem tak ruang chu field-ah chuan a let pheng phung a. 

Khawvel football thuneitu sang ber Fifa chuan inkhelh hrim hrimah hian mipui pungkhawm khuahkhirh turin steward emaw police te gas an hmang tur a nih loh thu an sawi ve thung.

Indonesia football association (PSSI) chuan chhui chian an tum thu an sawi nghal a, he thil thleng hian Indonesia football hmel a balin a tichhe hle niin an sawi bawk.

Football match-a tharum thawhna hi Indonesia ramah chuan thil thar a ni lo a, Arema FC leh Persebaya Surabaya te phei hi chu hun rei tak atang tawh a, inhmelma tawh a ni nghe nghe. 

Buaina chhuah an hlauh thawn vangin Persebaya Surabaya fans te chu inkhel ticket lei an phalsak lo a, mahse ticket hi an hralh chhuak hnem hle thung a, Chief Security Minister Mahfud MD-in Instagram lama a post dan chuan Kanjuruhan stadium-ah hian mi 38,000 chiah an len laiin inkhel tur ticket 42,000 hralh chhuah a nih thu a sawi.

President Widodo chuan Liga 1 game zawng zawng chhui chian a nih hma chuan chawlhsan vek turin thupek a chhuah a, he ramah hian inkhelh vangin hetiang thil rapthlak hi a thleng ngai tawh lovang, a ti. 

Kum 1964 khan Lima-a Peru-Argentina Olympic qualifier-a an tlanchhiatna lama an inchilnaah mi 320 an thi a, mi 1,000 chuangin hliam an tuar bawk.

UK-ah chuan Liverpool fans 97 chu kum 1989 khan Sheffield-a Hillsborough Stadium-ah chesualin an thi tawh bawk.