Zoliana Royte Memorial Hockey 5’s Indoor Tournament-ah Mizo player tha leh hriat hlawhte an tel dawn a, inbuatsaihnain a vawrtawp a thleng mek.

Mizorama panga leh pangaa khelh tur, 5’s Indoor Hockey inelna hmasa ber hi Thawhtanni zan dar 8:00-ah LPS Arena, Falkland-ah hawn a ni dawn a, fixture tichhuakin an inkhel zui nghal ang.

Hockey-ah Mizo hmeichhiate an thleng thui a, hmeichhe team 16 inel tur zingah 2016 Rio Olympics-a tel India squad zinga mi, Lalruatfeli’n Hnahthial District Association tan a khel dawn a, Railways player Lalhlunmawii’n Thenzawl Hockey Association tan a khel dawn bawk.

Hmeichhe hockey hmunpui, Thenzawl an langsar a; Hnahthial, Lunglei, Champhai, Saitual leh Mamit atangin district association team an tel bakah Durtlang atangin team hnih, Thingsulthliah, Hlimen, Sihphir leh Muthiin team khat an thawh.

Mipa team 18-in trophy an inchuh dawn a, India ram football inelna sang ber, Indian Super League (ISL)-a khel tawh, Ricky Lallawmawma leh Isaac Vanmalsawma ten Durtlang Hockey Association tan an khel dawn a, player mala ngaihven hlawh zinga mi an ni.

Hetih lai hian mipa hockey hmunpui, Kawnpui khua atangin mipa team nga an tel a, Durtlang leh Sihphirin team hnih ve ve thawhin Hlimen, North Lungleng, Sialsuk, Bungkawn, Samlukhai, Thenzawl, Hualngo, Kolasib leh Baktawngin team khat theuh an nei bawk.

August 25-ah final tura ruahman niin Mizoram hockey dinhmun pho lanna tur a ni a, LPS Vision-in live-in inkhel a pe chhuak ang.

June 24 atanga 29 chhungin Thenzawlah Zoliana Royte Memorial Hockey Tournament thawh khatna neih a ni tawh a, mipa team ruk leh hmeichhia team li an tel a ni.