Ineos Grenadiers chuan kum 2023 atan French vawi tham world champion tawh Pauline Ferrand-Prevot chu an lalut.

Kum 30 mi hi an team rider tura hmeichhia an lakluh hmasak ber a ni a, road cycling lamah huam zau zawka kal an duh a, bul tan nan an hmang a ni. 

Mountain bike world title pariat bakah road, cyclocross leh gravel world title a la tawh Ferrand-Prevot chuan,"Ineos Grenadiers nena inremna siam hi ka tan chuan mumang ang hial a ni," a ti. 

Sawi zawmin,"Paris-a 2024 Olympic a inlan hi thil ropui tak a ni. Ram mipui hmaah intihsiakna ka hmachhawn thei dawn a, tlan chak ber nih ka duh a ni. Kum hnih chhunga ka thil tum lian ber a ni bawk ang," a ti.

Ferrand-Prevot hian kum 2014 khan road world title a la a, kum 2015-ah cyclocross world champion a ni bakah kar tawp khan Gravel World Championship hmasa ber a la leh bawk.

A sawi zelnaah,"Olympic gold medal te chauh hi ka la hum loh a nih vangin ka duh ber a ni. Ineos Grenadiers ka zawm chhan pawimawh tak pakhat a ni," a ti.

Ineos-a mipa team hian kum 2010-a road cycling World Tour an zawm hnuah hlawhtlinna ropui tak an chang a - Team Sky angin - Tour de France-ah vawi sarih hnehna an chang.