Mizoram University hi Central University niin kum 2001 khan din a ni a, Mizorama zirna insang ber a ni. Kum tinin zirlaiten intihlimna hun festival an hmang thin a, Department hrang hrangte an intihsiak thin. 

Intihsiak nan hian item chi hrang hrang thlan thin a ni a, sports lam kaihhnawih a tam ber thin. A taka kheh chi futsal atanga FIFA game leh online game thlengin a leng vek thin. Article inziah siak atanga runway showdown thlengin a kim viau. 

Inferno
MZU festival hi a tirah chuan a hmingah 'Inferno' tih a ni thin a, kum 2016 vel atang khan a hming hi 'Virthli' tiin an thlak. JF Dictionary-ah chuan Infero tih awm zia chu, 'hremhmun, meidil, hmun hreawm' tihna a ni a, a tha lam a kawk lo fai vek. MZU Vice Chancellor pakhat chuan hei hi tha tiloin a hming hi thlak a ni ta nia sawi a awm - tak tak ni maw? 

Mipui mit fukna
Engpawh chu nise Mizorama zirna insang ber a ni a, mi ngaihsan a nih avangin ngaihven a hlawh em em reng. Tun hnaia Virthli tawp zana thil thleng pawh khan rei lote chhungin Zoram a deng chhuak a, social media titi pui ber a ni nghal. An costume, choreography leh creative te tha viau mah se, lo che over fal deuh an awm hian a buai zo ta thin a ni.  

A tawp ni/zanah Runway Showdown a awm thin a, Department hrang hrang an inel thin - festival chhunga boruak nei lian leh ngaihven hlawh ber a ni thin. Kuminah hian a buatsaihtu lam ten theme atan 'Seven Deadly Sins' an thlang a, zirlai thenkhat an tangulh deuh nge ni - che 'bon' fal deuh kha an awm ta kha a ni a...

Seven Deadly Sins hi sual bul pasarih an tih mai - Pride (chapona), Greed (duhamna), Wrath (huatna/thinurna), Envy (thikna), Lust (hurna), Gluttony (virna) leh Sloth (thatchhiatna) te an ni a, chung thil lantir/chang chhuak tur chuan thil tha tak tih kha a remchang lo ve te pawh a ni mahna! 

Tun hnuah chuan MZU thuneitute leh zirlaite pawhin fimkhur phah nan an hmang tawhin a rinawm a, a tha zawngin hmasawnna a thlen ngei beisei phawt ang.