ZALEN, Oct. 9, 2024: Mizoram sawrkar chuan kum liam ta chhunga Mizoram chawimawitu infiam mi 321 hnenah chawimawina tangkafai a hlan a, an zingah hian hockey player Lalremsiami Hmar Zote chuan Rs. nuai 14.5 a dawng a, dawng hnem ber a ni.

Dawrpui Multipurpose Centre, Aizawla Nilaini chawhnua khawvel leh India ram huapa infiamna lama hmingthate chawimawina tangka fai hlanna (Incentive Cash Awards to Meritorious Sportsperson) hi Sports & Youth Services Minister Lalnghinglova (Tetea) Hmar pawhin khuallian niin a hmanpui.

Lawmpuina tangkafai hlante hi infiam mi 321 bakah anmahni buaipuia kaihruaitu (official) mi 95, an vaiin mi 416 an ni a. An zinga 276 chu mipa niin hmeichhia 131 an ni a. Rs 1,10,92,000 sem chhuah a ni.

Lawmpuina hlante hi April 1, 2023 leh March 31, 2024 inkara medal late an ni a. Infiamna chi hrang hrang 15 - badminton, basketball, belt wrestling, boxing, football, hockey, tennis, sepaktakraw, shooting, table tennis, taekwondo, volleyball, weightlifting, wrestling leh wushu-a gold, silver leh bronze medal latute an ni.

Tun tum incentive cash award semnaah hian Remsiami bakah Jeremy Lalrinnunga (weightlifting), Lalruatfela- (weightlifting) leh Cindy Lalruatpuii Colney (football) te chu khawvel huapa lawmman la thei an ni.

Mi mala sum fai la hnem ber chu Indian women hockey team-a player pawimawh ni mek, Remsiami niin Rs. 14,50,000 a dawng a. 19th Asian Games-ah bronze a lak avangin Rs. 7,50,000 leh 2023 Women’s Asian Championship-ah gold a lak avangin Rs. 7,00,000 hlan a ni.